कानुनी रुपले विद्यालयको विवाद समाधान गरौँः मेयर यादव

न्यूज ब्यूरो, जनकपुरधाम । धनुषाको गणेशमान चारनाथ नगरपालिकाका मेयर जीतनारायण यादवले बरमझियास्थित रहेको एक विद्यालयको विवाद कानुनी समाप्त गर्न निर्देशन दिएका छन् ।

धनुषाको गणेशमान चारनाथ नगरपालिकाको बरमझियास्थित रहेको माध्यमिक विद्यालय बरमझियाका प्रधानाध्यापकले राजीनामा गरि सकेकी शिक्षिकालाई पुनः विद्यालयमा हाजिरी गराउँदा स्थानीयबासीहरुले तालाबन्दी गरेपछि मेयर यादवले कानुन अनुसार गर्न निर्देशन दिएका छन् ।

केही सँचार माध्यमहरुमा आफ्नो नाम समेत जोडेको भन्दै मेयर यादवले विद्यालयको सो प्रकरणमा आफ्नो कुनै पनि सँलग्नता नरहेको प्रष्टाउँदै कानुन सम्वत प्रक्रिया बढाएर विवाद समाप्त पार्न निर्देशन दिएका छन् ।

विद्यालय प्रशासन र वडालाई सो समस्या यथाशिघ्र समाधान गरी विद्यालयमा शान्ति कायम गर्न भनेका छन् । राजनीतिक प्रतिशोधले विद्यालय जस्तो संवेदनशिल र शान्तीपूर्ण क्षेत्रलाई बन्द, हडतालले बालिकाहरु आजित भएको बताउँदै उनले यथाशिघ्र समस्या समाधान कानुनी रुपमै गर्न बताएका छन् ।

शिक्षा ऐन बमोजिम कानुन सम्वत गरी यसको बारेमा आफू कहाँ अपडेट गर्न समेत मेयर यादवले विद्यालय प्रशासनलाई निर्देशन दिएका छन् । केही व्यक्तिहरुले राजनीतिक प्रतिशोधले पनि विद्यालयमा राजनीति गर्न खोजेको बताउँदै कानुनी रुपमा मात्र गर्न उनले बताएका छन् ।

स्थानीय तहको निर्वाचनमा उपमेयर पदमा उम्मेदवार बनेकी शिक्षिका रेखा यादवले बैसाख ८ गते राजीनामा दिएकी थिइन् ।

शिक्षका यादव प्रावि तह राहत तृतीय श्रेणी पदमा कार्यरत रहँदै आएकी थिइन। स्थानीय तहको निर्वाचन नजिकिदै गर्दा शिक्षिका रेखा यादवले विद्यालयको प्रधानाध्यापकलाई संवोधन गर्दै मिति ०७९ बैसाख ८ गते घरायसी कारण देखाइ राजीनामा दिएको थियो ।

राजीनामा दिएर पनि पुनः विद्यालयमा पढाउन गएपछि केही राजनीतिकर्मीहरुले उनको विरोध जनाउँदै तालाबन्दी गरेको छ ।