असार १५ गते बैनरमा होईन, व्यवहारमा लागू हुनुपर्छः अध्यक्ष साह

न्यूज ब्यूरो, जनकपुरधाम । धनुषाको धनौजी गाउँपालिकाका अध्यक्ष राजकुमार साहले असार १५ गते किसानको लागि व्यहारिक रुपमा लागू गर्नुपर्ने बताएका छन् ।

बुधबार १७ औँ राष्ट्रिय धान दिवसको अवसरमा आयोजित एक कार्यक्रममा अध्यक्ष साहले बैनर र तडकभडक भन्दा पनि किसानको खेतमा धान दिवस हुनुपर्ने बताए । उनले कार्यक्रमभन्दा समयमा मलखाद्य उपलब्धता नै धान दिवस हुने बताए ।

उनले असार १५ गतेसम्म धनुषामा रोपाई सबभन्दा कम हुनु नै दुःखद रहेको र यसले किसानको पीडालाई झल्काएको भन्दै यस्तो अवस्थामा धान दिवसको आयोजना अनुचित नै भएको बताए ।

गाउँपालिकाद्धारा आयोजित धान दिवसको अवसरमा बोल्दै उनले किसानहरुले मल सहज रुपमा पाउनको लागि आफू प्रयास गरेपछि केन्द्र सरकारले नै देशमा मल भित्र्याउन नसक्दा देशव्यापी मल सँकट भएको बताए ।

उनले रासायनिक मलभन्दा पनि अब विकल्पको रुपमा प्राराँगारिक मलको जोहो गर्नुपर्ने अवस्था आएकाले आउँदो आर्थिक बर्षमा प्राराँगारिक मल उत्पादनको लागि किसानहरुको लागि नयाँ कार्यक्रम र मेसिन ल्याईने बताए ।

धान बालीमा जैविक विविद्यताको उपयोग, आयात प्रतिस्थापनमा सहयोग” मूल नाराको साथ आयोजना गरिएको धान दिवसको अवसरमा बोल्दै गाउँपालिका उपाध्यक्ष रामबति देवी मण्डलले कृषि देशको अर्थतन्त्रको ठुलो खम्बा रहेको बताईन् ।

उनले मधेश प्रदेशको उब्जनीले सिँगो देश धान्न सकिने अवस्था भएपनि यसलाई आधुनिकीकरण र किसानको अपेक्षा बमोजिम औजार, मल, उन्नत बीउ उपलब्ध नहुँदा दिनानुदिन उब्जनी घटदै गएकोप्रति चिन्ता व्यक्त गरिन् ।

उनले आगामी आर्थिक बर्षको बजेटलाई कृषिलाई प्राथमिकतामा राखिएका जनाइन् । सो कार्यक्रममा वडाध्यक्षहरु, कर्मचारीहरुसहित सर्वसाधारणहरुको सहभागीता रहेको थियो ।