रौतहटको आनन्द पोलिक्लीनिकमा अझै नक्कली डाक्टर चेक गर्छन विरामी, प्रशासनको पनि मिलोमत्तो

न्यूज ब्यूरो, रौतहट । मधेश प्रदेशको रौतहटस्थित निरन्तर विगत ६ बर्षदेखि गैर कानुनी रुपमै सँचालनमा रहेको आनन्द पोलिक्लीनिकमा अझै नक्कली डाक्टरले विरामी चेकजाँच गरिरहेको पाईएको छ ।

मानिसको अति संवेदनशिल मानिएको स्वास्थ्यसँग दिनहुँ खेलवाड गर्ने आनन्द पोलिक्लीनिक एण्ड एक्यूपँचर सेन्टर प्रा.लि. विगत ६ बर्षदेखि नै गैर कानुनी सँचालनमा रहेको छ ।

रौतहट जिल्लाका प्रशासनले सो क्लीनिकलाई सँचालन गर्न दिएको प्रष्ट छ । रौतहटको सिडिओ, एसपीसहित अन्य सरोकारबाला निकायको समेत मिलोमत्तोमै सो क्लीनिक विगत ६ बर्षदेखि निरन्तर गैर काुननी रुपमै सँचालन रही सरकारको करोडौँ रुपैयाँ कर छली गर्दै आएको छ ।

रौतहटको गरुडा नगरपालिका वडा नम्बर ५ शिवनगर स्थित रहेको आनन्द पोलिक्लीनिक एण्ड एक्यूपँचर सेन्टर प्रा.लि.मा अझै पनि एनएमसिमा नाम नै नभएको नक्कली डाक्टर उमेश जयशवाल अझै विरामी चेकजाँच गर्ने गरेको छ ।

सो पोलिक्लीनिकमा ७५ प्रतिशत विरामी भारतबाट आउने गरेको छ । सो क्लीनिकमा हुने अन्य काण्डहरु पनि प्रशासनकै मिलोमत्तोमा दबाउने गरिएको तथ्य नाम नखोल्ने शर्तमा एक स्थानीयले बताए ।

विगत ६ बर्षदेखि नै सँचालनमा रहेको सो पोलिक्लीनिकमा एउटा नै डाक्टर नरहेको बताइएको छ । पोलीक्लीनिकको लागि ५ बेडको सैया सँचालनमा राख्नुपर्ने भएपनि यी पोलिक्लीकमा ५५ बेडसम्म सँचालनमा रहेको पाइएको छ ।

पोलिक्लीनिकका चिकित्सक उमेश जयसवालसँग भारतबाट किनेर ल्याएको फर्जी डिग्री रहेको आरोप छ । उनले कोलकत्ताबाट पढेर बिना काउन्सिल नम्बरकै गैर–कानुनी रुपमा पोलीक्लीनकमा विरामी चेकजाँचदेखि उपचारसम्म गरिरहेको बुझिएको छ । यसबारे उनको डिग्रीको सबालमा उनले देखाउन मानेनन् ।

एउटा चिकित्सकको एउटा काउन्सिल नम्बर हुनुपर्नेमा आफूलाई डाक्टर भनेर स्वघोषित गरेका जयसवालले विभिन्न काउन्सिलहरु उल्लेख गरेका छन् । एकुपँचर डिग्री गरेर उनले डाक्टर लेख्न नपाएपनि उनले बोर्डमा आफूलाई डाक्टर लेखेका छन् ।

जयसवालले आफूलाई बरिष्ठ डाक्टरको रुपमा परिचय दिँदै आएका छन् । उनले पोलिक्लीनकमा ५ बेडको लागि मात्र दर्ता रहेको स्वीकारे । तर, ५० देखि ५५ वडा बेड सँचालन गरी सरकारको करोडौँ रुपैयाँ राजस्व छली गर्दै आएको छ ।

सो पोलिक्लीनकमा अझै पनि एउटा एम.बि.बि.एस. डाक्टरलाई ढाल बनाएर प्रयोग गरिरहेका छन् । जयसवालसँग फर्जी काउन्सिल नम्बर रहेको बुझिएको छ । यद्यपी, यसबारे उनले कसैलाई केही बोल्दैनन् । केही पत्रकारहरुलाई समेत मिलाएर रौतहटको प्रशासनसँग मिलोमत्तो गरेरै सरकारको करोडौँ राजस्व छली भईरहेको छ ।

गत वर्ष रौतहटमा प्रमुख जिल्ला अधिकारी (सिडिओ) ईन्द्रदेव यादव रहँदा उनको टोलीले सो पोलीक्लीनकबाट लेटरहेडहरु उठाएर लगेको थियो, तर देखावटी रुपमा मात्र । गैर–कानुनी रुपमा सँचालनमा रहेको सो पोलीक्लीनिकसँग प्रशासन समेत मिलेर गैर कानुनी धन्दा सँचालन गर्दै आएको प्रष्ट छ ।

६ बर्षदेखि नै नक्कली डाक्टर, करोडौँ राजस्व छली गर्दै आएपनि प्रशासनले कुनै कारवाही गर्न नसक्नु प्रत्यक्ष मिलोमत्तो गरेको प्रष्ट छ ।

यता, पोलीक्लीनिकका सँचालक शिव शँकर साहले अस्पतालमा दुईवटा एम.बि.बि.एस. डाक्टर कार्यरत रहेको बताएका छन् । उनका अनुसार, डा. आरपी यादव र डा अनिल कुमार सो पोलीक्लीनिकमा कार्यरत रहेका छन् ।

पोलीक्लीनिकको मेडिकल अफिसर समेत राखेको भन्दै त्यसको लागि डा. राम प्रगास यादव कार्यरत रहेको दाबी गरेको छ । तर, उनले भनेको चिकित्सकहरुको एनएमसी नम्बर भने मेडिकल काउन्सिलको अनलाईनमा फेला परेनन् । आफूलाई डाक्टर भन्दै आएका जयशवालको एनएमसि नम्बर पनि फेला परेनन् ।

गत वर्ष सिडिओको टोलीले जयशवालको डिग्री, सर्टिफिकेटकहरु चेकजाँचको लागि लगिएपनि कुनै प्रतिवेदन भने पेश गरिएको देखिएनन् । जयशवाललाई उन्मुक्ति दिन पनि प्रशासनले लाखौँ रुपैयाँ मासिक लिएको आरोप स्थानीयको छ ।

सँचालक साहले जनस्वास्थ्यबाट ५ बेडको मात्र स्वीकृति भएपनि नगरपालिकाबाट २५ बेडको स्वीकृति लिएको दाबी गरिएको छ । यद्यपी, नगरपालिकाले २५ बेड सँचालनको लागि अनुमति दिने कानुन भने नरहेको छ । २५ बेड पनि सँचालन गर्नको लागि जनस्वास्थ्यबाट नै अनुमति लिनुपर्ने प्रावधान छ । सो क्लीनिकमा ५५ बेडसम्म सँचालन भएको पाईएको छ, जस अनुसार बार्षिक करोडौँ रुपैयाँ राजस्व छलीको आशँका छ ।

यता, उमेश जैयसवालको सन्दर्भमा सँचालक साहले उनी एक कर्मचारी मात्र रहेको बताएका छन् । उनी डाक्टर नभएर एक्युपँचर मात्र रहेको बताईएको छ । तर, जयशवाल भने आफूलाई डाक्टर भन्दै विरामी चेकजाँच गर्दै आएका छन् ।

सो क्लीनिकमा चिकित्सकको कारणले ज्यान गएपनि प्रशासनको मिलोमत्तोमा तथ्यलाई तह लगाउने गरेको बुझिएको छ । अहिले रौतहटमा कृष्ण बहादुर शाही प्रमुख जिल्ला अधिकारी हुन् ।