कमला नगरपालिकाको माचि झिटकैयामा आँखा शिविर सम्पन्न, ४० जनामा मोतियाविन्द

न्यूज ब्यूरो, जनकपुरधाम । पूर्वी धनुषाको कमला नगरपालिकाको आयोजनामा राखिएको तिनदिने आँखा शिविरको प्रथम दिन माचि झिटकैयामा शिविर सम्पन्न भएको छ ।

कमला नगरपालिकाको कार्यालय धनुषाको आयोजनामा तथा रेयुकाइ एईको मासुनागा आँखा अस्पताल ढल्केवर धनुषाको प्राविधिक सहयोगमा आईतबार प्रथम दिन निःशुल्क आँखा शिविर सम्पन्न भएको हो ।

आईतबारको शिविरमा कुल ३ सय २६ जनाले सेवा लिएको स्वास्थ्य शाखा प्रमुख रामकुमार ठाकुरले जानकारी दिए । उनका अनुसार ३ सय २६ जनाको चेकजाँच गरिएकोमा त्यसमध्ये ४० जनाको मोतियाविन्दु भेटिएको बताए ।

आर्थिक अभाव र दुरीको कारण समेत अस्पतालसम्म जान नपाएका सीमान्तकृत, कृषक, गरिब, निमुखाहरुले स्थानीय स्तरमै सेवा पाएपछि हर्षित देखिए । कमला नगरपालिकामा स्थानीय सरकार गठन भएदेखि नै प्रथम पटक निःशुल्क आँखा शिविर भएको भन्दै स्थानीय सरकार र कर्मचारीप्रति कृतज्ञता प्रकट गरेका थिए ।

चेकजाँचबाट ४० जनामा मोतियाविन्दु शिकायत देखिएकोले उनीहरुको असार १ गते अप्रेशन हुने सँयोजक ठाकुरले जानकारी दिए । उनीहरुको अप्रेशन धनुषाको ढल्केवरस्थित रहेको रेयुकाई आँखा अस्पतालमा हुने भएको छ ।

अप्रेशन गर्नुपर्ने भनिएको विरामीहरुलाई सबै थोक निःशुल्क हुने जनाइएको छ । उनीहरुलाई नगरपालिकाको तर्फबाट आउने बस लिएर जाने तथा पुरयाउने नगरपालिकाका प्रमुख प्रशासकीय अधिकृत सुबोध कुमार ठाकुरले जानकारी दिए ।

ठाकुरका अनुसार, यहाँका नागरिकको सुविधा हेतु एउटै बसमा बसाएर आँखा अस्पतालसम्म पुरयाउँदै पुनः फिर्ता समेत गरिने छ । तिनदिने शिविर अन्तर्गत सोमबार अर्थात आज दुबरकोट हथलेटवामा शिविर सँचालन हुनेछ भने भोली मँगलबार अन्तिम दिन लक्कडमा शिविर सँचालन हुने भएको छ ।

शिविरको क्रममा आवश्यक व्यक्तिहरुलाई चश्मा र औषधी निःशुल्क वितरण गरिएको थियो ।

शिविरको कमला नगरपालिकाका नगर प्रमुख विशेश्वर यादव, वडा नं. २ का वडाध्यक्ष ठकु यादव, प्रमुख प्रशासकीय अधिकृत सुबोध कुमार ठाकुर, वडा नं. ३ का वडाध्यक्ष राम भगत यादव, वडा नं. ४ का वडाध्यक्ष पप्पु गोहिवार, वडा नं. १ का वडाध्यक्ष सरद देव यादव लगायतको विशेष उपस्थितिमा उदघाटन गरिएको थियो ।

उदघाटन कार्यक्रममा रेयुकाई आँखा अस्पतालका चिकित्कहरुको टिम, स्वास्थ्य शाखाका सँयोजक रामकुमार ठाकुर, उपसँयोजक अमरेश कुमार यादव, जिन्सी शाखाका युगलकिशोर यादव, पशु शाखाका रबिन्द्र कुमार यादव लगायत अन्य कर्मचारीहरुको उपस्थिति रहेको थियो । प्रहरी चौकी माचि झिटकैयाले सुरक्षा व्यवस्था मिलाएको थियो भने नेपाली सेना महेन्द्रनगरबाट समेत टोली खटेको थियो ।