स्वास्थ्य कार्यालयले जबरदस्ती औषधी पठाएपछि कमला नपामा दर्जनौ औषधी बर्बाद

न्यूज ब्यूरो, जनकपुरधाम । जिल्ला जनस्वास्थ्य कार्यालयले मागभन्दा अधिक औषधी पठाएपछि म्याद गुज्रिएर बर्बाद भएको छ ।

धनुषाको कमला नगरपालिकामा स्वास्थ्य शाखाले माग गरेको भन्दा अधिक अनुपातमा औषधी पठाएपछि करिब १ लाख रुपैयाँ बराबरको औषधी बर्बाद भएको हो ।

नगरपालिकाको विभिन्न स्वास्थ्यचौकीमा माग भएको औषधी भन्दा स्वास्थ्य कार्यालयले अधिक मात्रामा औषधी पठाइदिएपछि म्याद गुज्रिएको हो । म्याद अन्तिम रहेको बेलाको औषधी समेत पठाउँदा समयमा खपत हुन नसक्दा बर्बाद भएको हो ।

औषधीको साथै, बच्चाहरुको लागि आएको पौष्टिकयुक्त आरयुटिएफ पनि लाखौँको बर्बाद भएको छ । आरयुटिएफको समेत खपत कम हुँदा ११ हजार बढी प्याकेट आरयुटिएफको म्याद गुज्रेको हो ।

छालामा हुने दाद रोगमा प्रयोग गरिने फोलिक एसिड नामक औषधी २२ हजारभन्दा बढी वटा टयाबलेटको म्याज गुज्रको मुचुल्का उठाईएर नष्ट पारिएको हो ।

स्वास्थ्य शाखाका तत्कालिन सँयोजक रहेका सत्यनारायण ठाकुरले स्वास्थ्य कार्यालयमा माग बमोजिमकै माग पठाएपनि त्यहाँबाट म्याद नै गुज्रने भन्दै अधिक मात्रा बोकेर ट्रक नै ल्याएपछि यहाँ म्याद गुज्रेको बताए ।

उनले माग गरिए अनुसार मात्रै आएको भए यहाँको स्टोरमा म्याद गुज्रने थिएनन्, तर यतिको औषधी खपत नै नभई म्याद गुज्रनु स्टोरमा समान्य मानिन्छ ।

समाजिक सँजालहरुमा नगरपालिकाका पूर्व मेयर रामउदगार गोईतले नै औषधी वितरण नगरेको सबालमा तत्कालिन सँयोजक ठाकुरले स्वास्थ्य र औषधी वितरणमा कुनै पनि जनप्रतिनीधिको कुनै भूमिका नै नभएको प्रष्टयाए । उनले यसमा कोही जनप्रतिनीधिको काम नै नरहेको बताए ।

उनले नगरपालिकाभित्र माग गरिए अनुसार औषधी हरेक समय परिपूर्ति गर्दै आएको बताउँदै स्वास्थ्य कार्यालयले जबरदस्ती मागभन्दा अधिक औषधी पठाएपछि म्याद गुज्रेको सुनाए ।

सो सन्दर्भमा पूर्व मेयर राम उदगार गोईतले औषधी र स्वास्थ्य जस्तो संवेदनशिल क्षेत्रमा आफू रहँदा कोही पनि जनप्रतिनीधिले कुनै हस्तक्षेप नगरेको बताए । उनले स्वास्थ्यचौकीहरुमा औषधी वितरणको कार्य आफूहरुको कार्यक्षेत्रभित्र नै नपर्ने भएकोले सम्बन्धित शाखाका कर्मचारीले मात्र बताउने बताए ।

मँसिरमा कार्यालयमा तालाबन्दी हुँदा निरन्तर भएको तालाबन्दीसहित प्रमुख प्रशासकीय अधिकृत पदस्थापन विवादमा समेत दुई महिना नगरपालिकामा विवाद नै रहँदै आएपछि स्टोरमा समेत प्रभाव परेको थियो ।

त्यस समयमा पनि विभिन्न वडामा रहेको स्वास्थ्यचौकीहरुले चाहिने बमोजिमको औषधी मागेपछि समयमै परिपूर्ति गरिएको थियो । माग नै नगर्दा अन्य औषधीहरु खपत हुन नसक्दा औषधीको म्याद गुज्रेको बताए ।

यस सन्दर्भमा वर्तमान स्वास्थ्य शाखा सँयोजक राम कुमार ठाकुरले स्टोर व्यवस्थापन र स्टोरमा मागभन्दा अधिक औषधी रहेकोले धेरै पुरानो औषधीहरुको समेत मुचुल्का गर्दा अधिक देखिएको बताए ।

उनले नगरपालिका स्थापना भएदेखि नै सो स्टोरमा राखिएको केही अन्य औषधीहरुको म्याद गुज्रेको, कोठामा बाढीमा पानी पस्दा पनि खराब भएको बताए ।