जिल्ला समन्वय समिति धनुषामा कांग्रेसको प्यानलै निर्विरोध

न्यूज ब्यूरो, जनकपुरधाम । जिल्ला समन्वय समिति(जिसस) धनुषामा प्रमुखसहित कांग्रेसको प्यानलै निर्विरोध निर्वाचित भएको छ ।

अन्य दलको उम्मेदवारी नपरेपछि नेपाली कांग्रेसको प्यानलै निर्विरोध निर्वाचित भएका हुन् । नेपाली कांगे्रसबाट जिसस प्रमुखमा क्षीरेश्वरनाथ नगरपालिका वडा नं. २ का वडासदस्य राजनन्दन मण्डल निर्विरोध निर्वाचित भएका हुन् । यसअघि पनि जिसस धनुषाको प्रमुख क्षीरेश्वरनाथ नगरपालिकाका रामदेव बनरैत यादव थिए ।

उपप्रमुखमा जनकपुरधाम उपमहानगरपालिका वडा नं. ४ की संगिता देवी ठाकुर निर्विरोध निर्वाचित भएकी छन् । यस्तै सदस्यहरुमा हंसपुर नगरपालिका–५ की सुनिता सदा, धनुषाधाम–८ का डम्बर बहादुर थापा मगर, शहीदनगर नगरपालिका–२ की गीता देवी यादव, औरही गाउँपालिका–३ का फगु यादव, नगराइन नगरपालिका–५ का इश्वरी शर्मा, जनकपुरधाम उपमहानगरपालिका–२१ का महेन्द्र महतो र मिथिला नगरपालिका–४ की श्रीमती विका मिजार सदस्यमा निर्विरोध निर्वाचित भएका हुन् ।

मुख्य निर्वाचन अधिकृतको कार्यालय धनुषाले सार्वजनिक गरेको जिसस निर्वाचन सम्बन्धी कार्यक्रम अनुसार बुधबार उम्मेदवारी दिने समयसीमा थियो । जिससमा अन्य कुनै दलले उम्मेदवारी नदिएपछि आपूmहरुको पार्टी प्यानलसहित निर्विरोध निर्वाचित भएको नेपाली कांग्रेस धनुषाका सभापति योगेन्द्र पजियारले बताए ।

जिससमा चार वटै प्रतिनिधिसभा निर्वाचन क्षेत्रको प्रतिनिधित्व गराइएको पजियारले बताए । तीन जना महिला, दलित र अल्पसंख्यकसहित सात जना सदस्यले उम्मेदवारी दिएको सभापति पजियारले बताए ।

२०७४ सालको निर्वाचनमा नेपाली कांग्रेस र तत्कालीन राष्ट्रिय जनता पार्टी बीच गठबन्धन भएको थियो । यस वर्ष भने नेपाली कांग्रेसले जिल्लामा स्पष्ट बहुमत ल्याएपछि अन्य दलले जिससमा नेतृत्वको लागि चासो लिएको छैन् ।

नेपाली कांग्रेसले १८ मध्ये १० पालिका प्रमुख र ११ उपप्रमुख जितेर पहिलो पार्टी बनेको थियो । जनकपुरधाम उपमहानगरपालिकाको प्रमुखमा निर्वाचित स्वतन्त्र उम्मेदवार मनोज साहको समर्थन पनि नेपाली कांग्रेसलाई थियो । ३६ मध्ये २२ मत नेपाली कांग्रेससहित रहेकोले अन्य दलले गठबन्धन गर्न पनि चासो लिएन् । अन्य सबै दलले गठबन्धन गरेपनि कांग्रेसको मत आवश्यक थियो ।

जिल्ला समन्वय समितिको प्रमुख, उपप्रमुख र सदस्यहरूका लागि नगरपालिकाका प्रमुख, उपप्रमुख, गाउँपालिका अध्यक्ष र उपाध्यक्षले मतदान गर्ने प्रावधान छ ।

निर्विरोध निर्वाचित भएको औपचारिक घोषणा भने जेठ २८ गते गरिने धनुषाका मुख्य निर्वाचन अधिकृत ब्रजेश प्याकुरेलले बताए । धनुषाको १८ वटै पालिकामा कार्यपालिकाको निर्वाचन सम्पन्न भएपछि निर्वाचन अधिकृतको कार्यालयले आउँदो जेठ २८ गतेको लागि जिससको निर्वाचन तोकेको थियो ।

२३ गतेदेखि निर्वाचनको कार्यक्रम शुरु गरेर २५ गते बुधबार मनोनयन पत्र दाखिला गर्ने कार्यक्रम थियो । जिससमा निर्वाचित जनप्रतिनिधिहरु उम्मेदवार बन्ने प्रावधान रहेको छ ।