अपडेटः मुटु फेर्नुपर्ने बालक मुखियालाई विदेशबाट पनि आर्थिक सहयोग जारी

न्यूज ब्यूरो, जनकपुरधाम । धनुषा जिल्लाको कमला नगरपालिका वडा नम्बर ३ लगमा बस्ने सन्दिप मुखियाका ७ बर्षिय छोरा सुरज कुमार मुखियाको बचाउ अभियानमा विदेशबाट युवाहरुले आर्थिक सहयोग पठाएको छ ।

मुटुको विरामीबाट गुज्रिरहेका मुखियाको उपचारमा मोटो रकम माग भएपछि उनलाई विभिन्न सँघसँस्था तथा व्यक्तिहरुले सहयोग गर्न सुरु गरेको छ । सहयोगी हातहरुले व्यक्तिगत रुपमा पनि खातामा रकम पठाएर सहयोग जारी राखेको छ ।

सोही क्रममा शुक्रबार विदेशमा बस्ने युवाहरुको एक समूहले बालक बचाउको लागि ३४ हजार रुपैयाँ सहयोग पठाएको हो । उनको मुटु फेर्नुपर्ने भएकोले भारतमा लिएर जाने तयारीमा रहेका अभिभावकले सबै सम्पति बेचेपनि उपचार हुन नसक्दा अन्त्यमा सहयोगीहरुसँग गुहार लगाएको हो ।

लगमा बस्ने देवलाल यादवको प्रयासमा उनको कम्पनीमा काम गर्ने नेपाली युवाहरुले एक एक पैसा जम्मा गरी मुखियालाई बचाउनको लागि सहयोग पठाएको हो ।

स्थानीय व्यावसायी रामजीवन साहले पठाएको सो रकम पीडित बालकको बुवा सन्दिप मुखियालाई स्थानीयहरुको रोहबरमा हस्तान्तरण गरेको हो ।

मुखियाको हर्ट ट्रान्सपलान्ट (मुटु प्रत्यारोपण) गर्न करिब ५० लाख रुपैयाँको आवश्यता परिवारजनले बताएको छ ।