'एक घर एक बैँक खाता' को अवधारणा लागु गर्छुः वडाध्यक्ष यादव

न्यूज ब्यूरो, सिरहा । मधेश प्रदेशको सिरहा जिल्लास्थित नवराजपुर गाउँपालिका वडा नम्बर २ का नव निर्वाचित वडाध्यक्ष सुरेश कुमार यादवले गाउँलाई बैँकसँग जोडने निर्णय गरेका छन् ।

अहिलेको प्राविधिक युगमा पनि ग्रामिण भेकमा बैँकसम्मको पहुँच न्यून नै रहेको बताउँदै उनले कम्तीमा एक घर, एक बैँक खाताको अवधारणा लागू गर्ने बताए ।

भावी बचतको लागि तथा सम्पति सुरक्षाको लागि समेत बैँक खाता अति आवश्यक तत्व भईसकेको अवस्थामा बैँकमा अझै पहुँच नभएको नागरिकलाई विधिपूर्वक बैँकमा अनिवार्य पहुँच बनाउने उनले पहिलो निर्णय गरे ।

पदभार ग्रहण गर्दै वडाध्यक्ष यादवले बैँक खाताको अभावमा फजुल खर्च, चोरीको समस्या, घरमा पैसा राख्ने तनावबाट मुक्ति सहित अन्य कारोबारहरु समेत डिजिटल हुने भएपछि वडा समृद्धिको एक पाईला टेक्ने बताए ।

सिभिल बैँकमा क्रेडिट म्यानेजरमा काम गर्दै आएका नव निर्वाचित वडाध्यक्ष यादवले एक घर एक बैँक खाताको अवधारणा लागू गरेपछि वडाबाट हुने अन्य कार्यहरु समेत घरमै बसेर गर्न सकिने विधि अपनाइने बताए ।

गत बैशाख ३० गते सम्पन्न चुनावमा उनी जनता समाजवादी पार्टी (जसपा) नेपालबाट वडामा ४२९ मत ल्याएर निर्वाचित भएका हुन् । उनी २७ बर्षका हुन् ।