कमला नगरपालिकाका मेयरको पहिलो प्रशँसनीय निर्णय, स्कूलको अवस्था सुधार गर्न पूर्ण डिजिटल बनाउने

न्यूज ब्यूरो, जनकपुरधाम । पूर्वी धनुषाको कमला नगरपालिकाका नव निर्वाचित नगर प्रमुख (मेयर) विशेश्वर यादवले पदभार ग्रहण गर्दै प्रथम निर्णय शिक्षा सुधारको लिएका छन् ।

कमला नगरपालिकाको विभिन्न वडामा रहेको विद्यालयहरुको अवस्था जरजर र दयनीय रहेको आफू प्रत्यक्ष देखेको बताउँदै सबै विद्यालयमा डिजिटल प्रणाली लागू आफ्नो पहिलो प्राथमिकतामा रहेको बताएका छन् ।

कमला नगरपालिकाका नव निर्वाचित जनप्रतिनीधिहरुलाई सपथ खुवाउँदै मेयर यादवले नगरभरि रहेको सबै स्कूलहरुमा सिसिटिभी क्यामेरा जडान, सोलार सिस्टम र ईनभर्टर जडान, कम्यूटर ल्याबको यथाशिघ्र स्थापना गरी विद्यालयको सम्पूर्ण कनेक्सन नगरपालिकासँग राख्ने बताएका छन् ।

विभिन्न वडामा रहेको सरकारी स्कूलहरुमा एक कम्प्यूटर शिक्षक राखेर विद्यालयको विद्यार्थीहरुको डिजिटल ईन्ट्री, शिक्षकहरुको गतिविधि र ईन्ट्री, विद्यालयमा ल्याप्चे मेसिनमा हाजिरी, विद्यार्थीहरुको डिजिटल रेकर्ड, परीक्षाफल, मार्कसिट, प्रगति विवरण लगायत सम्पूर्ण गतिविधिहरु डिजिटल गरी शिक्षा प्रणाली सुधार गर्ने बताए ।

विहिबार दिउँसो पदभार ग्रहणपछि न्यूज ब्यूरोसँग कुराकानी गर्दै मेयर यादवले प्रस्ताविक केही ठाउँहरुमा मावि सँचालन, उच्च मावि सँचालनको लागि सबै प्रक्रिया यथाशिघ्र हुने बताउँदै शिक्षा प्रणालीको सुधारको लागि आफ्नो पहिलो कदम रहेको सुनाए ।

सरकारी विद्यालयमा शिक्षकहरु नै नजाने, गरिब, निमुखा, अल्पसँख्यक, सीमान्तकृत समुदायका बालबालिकाहरु अध्ययन अध्ययापनको लागि सरकारी विद्यालयमै निर्भर रहेको बेला विद्यालयको राजनीतिकरणबाट मुक्ति गर्न पनि डिजिटल प्रणाली लागू गर्ने बताए ।

ग्रामिण भेकमा डिजिटल प्रणाली लागू गर्न कठिनाई हुने एक प्रश्नमा मेयर यादवले विभिन्न विद्यालयमा रहेको विद्यालय व्यवस्थापन समितिलाई विघटन गरी अर्को समिति वा सोही समितिलाई निरन्तरको आधार मानेर कार्य गर्ने बताए ।

उनले ग्रामिण भेकमा पनि सबै विद्यालयमा सोलार सिस्टम, सुरक्षाको पूर्ण प्रतिबन्ध, विद्यालयको भवनको मर्मत सम्भार, शिक्षकहरुको गतिविधि सिसिटिभी क्यामेरामै नगरपालिकामा मोनिटरिँग हुने बताए ।

विभिन्न स्कूलहरुमा समेत कम्प्यूटरमा सफ्टवेयर मार्फत सबै तथ्याँक ईन्ट्री गर्नुपर्ने प्रणाली र सबै तथ्याँक नगरपालिकामा जम्मा हुने बताउँदै उनले विद्यार्थीहरुले मार्कसिट पनि वेभसाईटबाटै प्रिन्ट गर्न मिल्ने प्रणाली सुझाव अनुसार काम हुने बताए ।

विहिबार दिउँसो नगरपालिकाका प्रमुख प्रशासकीय अधिकृत सुबोध कुमार ठाकुरले उनलाई विधिवत रुपमा पदभार ग्रहण गराएका छन् । नगरपालिकाका लेखा प्रमुख सँजीव कुमार महतो, जिन्सीका युगलकिशोर यादव लगायत अन्य कर्मचारीहरुको रोहबरमा पदभार ग्रहण गरेका हुन् ।

सो क्रममा नगरपालिकाका पूर्व मेयर रामउदगार गोईत, नेपाली काँग्रेसका युवा नेता मनोहर ठाकुर लगायत अन्य दलका प्रतिनीधिहरुले मेयर यादवलाई शुभकामना, बधाई सहित स्वागत गरेका थिए ।