५ बर्षको अन्तरालमै गाउँपालिकाभरि फुसको घरलाई जस्ता पाताको घर बनाउँछुः अध्यक्ष यादव

न्यूज ब्यूरो, सिरहा । ५ बर्षको कार्यकालमा गाउँपालिका भरी फुसको घरलाई जस्ता पाताको छानो बनाइने प्रतिवद्धता नरहा गाउँपालिका अध्यक्ष राम प्रमोद यादवले गरेका छन् ।

सिरहाको नरहा गाउँपालिकाको नव निर्वाचित अध्यक्ष राम प्रमोद यादवले आज पदभार ग्रहण गर्दै फुसको घरलाई जस्तापाताको घर बनाइने प्रतिवद्धता जाहेर गरेका छन् ।

नरहा गाउँपालिकामा आयोजित पदभार तथा सम्मान कार्यक्रमलाई सम्बोधन गर्दै अध्यक्ष यादवले मौखिक प्रतिवद्धता गर्दै मेरो कार्यकालमा गाउँपालिकामा रहेको सम्पूर्ण फुसको घरलाई जस्ता पाताको छानो बनाउने र आउँने दिनमा फुसको घर यस गाउँपालिकामा नदेखिने प्रतिवद्धता जनाएका हुन्।

साथै सम्बोधन गर्दै उनले गाउँपालिकामा जन्म दर्ता, मृत्यु दर्ता, बसाइ सराई , विवाह दर्तामा कुनै शुल्क नलाग्ने, सुत्केरीलाई पोषण भत्ता बापत रु. ५ हजार दिने, गरिब विप्पन तथा दलितको मृत्यु भएको खण्डमा अन्त्येष्टि (दाह कर्म) गर्न खर्च बापत रु।५ हजार दिने र सामाजिक सुरक्षा भत्ता समयमै उपलब्ध गराउने जस्ता महत्वपूर्ण कुराहरूको घोषणा गरेका हुन् ।