शहिदनगरमा उदय बरबरिया र रेखा कुमारीलाई जीताउनुस, समृद्धिको यात्रामा साथ छुः प्रचण्ड

न्यूज ब्यूरो, जनकपुरधाम । नेपाल कम्यूनिष्ट पार्टी (माओवादी) केन्द्रका अध्यक्ष पुष्पकमल दाहाल प्रचण्डले धनुषाको शहिदनगरमा पुनः मेयरमा उदय कुमार बरबरिया (यादव) र उपमेयरमा रेखा कुमारी मण्डललाई जीताउन अपिल गरेका छन् ।

शहिदनगरमा माओवादीबाट मेयरमा उम्मेदवारी दिएका उदय बरबरियाको चुनावी सभालाई मँगलबार सम्बोधन गर्दै प्रचण्डले उदय बरबरिया भिजन भएको उम्मेदवार रहेको बताउँदै उदयलाई जीताउन आग्रह गरे ।

शहिदनगर नगरपालिकाका निवर्तमान मेयर समेत रहेका बरबरियाले आफ्नो प्रतिवद्धता पत्रमा उल्लेख गरेको भिजनलाई औल्याउँदै प्रचण्डले प्रतिबद्धतापत्र उल्लेख भए बमोजिमको काममा कुनै त्रुटी नहुने र यसमा केन्द्र सरकारको पनि पुरै सहयोग रहने बताए ।

उनले भने, ‘उदयले आफ्नो भिजन बडो व्यवस्थित रुपमा भिजन प्रस्तुत गरिएको छ त्यसलाई पुरा गर्न हामी सबैको सहयोग हुन्छ । शहिदनगरको विकासमा उदय र रेखा मात्र छैन, त्यसको पछाडि माओवादी केन्द्रको अध्यक्ष नि छ । हाम्रो उम्मेदवार विजयी गराउनुस् विकास र समृद्धिको यात्रामा म तपाईको साथमा हुन्छु ।’

मौन अवधीको पूर्व सन्ध्यामा मेयरका उम्मेदवार बरबरियाको लागि चुनावी सभालाई सम्बोधन गर्न हेलिकप्टर चढी आएका प्रचण्डले शहिदनगरको समृद्धिको लागि उदय बरबरिया र रेखा कुमारी मण्डललाई विजयी बनाउ आग्रह गरे ।

धनुषाको शहिदनगर नगरपालिकामा आयोजना गरिएको चुनावी नगरसभालाई सम्बोधन गर्दै प्रचण्डले क्रान्ति र प्रगतिमा धनुषा जिल्ला र त्यसमा पनि यदुकूहा शहिदनगर अग्रणी स्थानमा छ । उनले भने, ‘यहाँ थुप्रै महान शहिदहरुको रगत बगेको छ ।

धनुषा जिल्ला नेपाली क्रान्तिको एउटा ईतिहास पनि हो । पञ्चायत देखि राजतन्त्र बिरुद्धको आन्दोलनमा होस् वा अन्य आन्दोलनको अग्रमोर्चामा धनुषा जिल्ला रहने गरेको छ ।’

सोही क्रममा बोल्दै प्रचण्डले नेकपा एमालेका अध्यक्ष केपी शर्मा ओली नेतृत्वको समान्ती गठबन्धन भएको बताए ।

उनले दुई–दुई पटक संविधान र संसद भंग गर्ने खोज्ने केपी ओली सामन्ती र ओलीसंग गठबन्धनको गरेका दलहरुले अझ पुरानो समान्ती भएको बताएका हुन् ।

केपी ओलीले पटक–पटक संसद भंग गरेर अलोकतान्त्रिक, असंवैधानिक, गैरसंवैधानिक र निरङकुश कदम चालेपछि गणतन्त्र, संघीयता र गाउँगाउँमा पुगेको सिंहदरवारको अधिकारको निम्ति सडक संघर्षबाट ओलीलाई परारस्त गरेको बताए । उनले भने, ‘ओली प्रवृतिले देश सिद्धायाउछ, देशलाई अनिणर्यको बन्दी बनाउँछ, त्यसैले समान्ती बिरुद्ध हामीले जहिले पनि लडनुपर्छ ।’

चुनावीसभामा मधेश प्रदेशका सचिव योगकुमार बरबरिया यादव (जीवन) ले शहिदनगरको समग्र विकासका लागि माओवादी केन्द्र निर्वाचनमा विजयी हुन आवश्यक रहेको बताए ।