तस्करसँगको सेटिँग र दिलीप हत्या काण्डमा मुछिएका डिएसपी 'यादव' लाई १३ सय रुपैयाँको पुरस्कार

न्यूज ब्यूरो, जनकपुरधाम । धनुषाको पर्यावरण अभियानी दिलीप हत्या काण्ड प्रकरणमा त्यतिबेला मुछिएका प्रहरी डिएसपी रामकुमार यादवलाई १३ सय रुपैयाँको पुरस्कार प्रदान गरिएको छ ।

मधेश प्रदेश प्रहरी कार्यालयले मधेश प्रदेशको सप्तरी जिल्लास्थित कँचनपुर ईलाका प्रहरी कार्यालयमा कार्यरत डिएसपी यादवलाई १३ सय रुपैयाँ पुरस्कार दिएको हो ।

विराटनगरको ईलाका प्रहरी कार्यालय रानीमा कार्यरत रहँदा तस्करसँगको सेटिँगपछि कारवाहीमा परेका थिए । वि.सं. २०७४ सालमा बोर्डरमा तस्करसँगकै सेटिँगले कारवाहीमा परेका थिए ।

उनलाई मधेश प्रदेश प्रहरी कार्यालयको तर्फबाट नगद १३०० रुपैयाँको पुरस्कार प्रदान गरिएको हो ।

यसका साथै, मधेश प्रदेश प्रहरी कार्यालयले अपराध अनुसन्धान, ट्राफिक व्यवस्थापन, शान्ति सुव्यवस्था कायम तथा चोरीतस्करी नियन्त्रणलगायत कार्यसम्पादनको कदरस्वरूप दर्जन बढी प्रहरी कर्मचारीलाई पुरस्कृत गरिएको छ ।

प्रहरी कर्मचारीलाई सकारात्मक प्रभाव पार्ने तथा भविष्यमा उत्प्रेरणा दिने भनेर प्रहरी नियमावलीअनुसार प्रहरी कर्मचारीहरूलाई पुरस्कृत गरिएको मधेस प्रदेश प्रहरी कार्यालयका प्रवक्ता एवम् एसपी जयराज सापकोटाले जानकारी दिए ।

पुरस्कृत भएका डिएसपी यादव २०७४ सालमा डिआईजी रमेश भट्टराई र मोरँगका एसपी (तत्कालिन) सन्दिप भण्डारीको कार्यकालमा कारवाहीमा परेका थिए । बोर्डरमा तस्करसँगको सेटिँग, तस्करहरुलाई लाइन दिएको आरोपमा डिआईजीको निर्देशनमा एसपीले जिल्ला तानेको थियो ।

वि.सं. २०७० सालमा तत्कालिन मोरँग प्रहरीका एसपी विश्वराज पोखरेलको पालामा घुमुवा प्रहरीको प्रमुख रहेका बेला यादव आर्थिक विवादमा मुछिएपछि उनलाई घुमुवाको ईन्चार्जबाट समेत हटाएको थियो ।

घुमुवाका रुपमा काम गर्दा तस्करीको लाइनसमेत खुलाएको र सुपारी तस्करबाट मोटो रकम लिएका कारण उनी कारवाहीमा परेका थिए ।

यस्तै, धनुषा ढल्केवरका दिलीप महतो हत्या प्रकरणमा मुचुल्का नै नगरी लास प्रादेशिक अस्पतालमा पठाएपछि उनलाई धनुषाका तत्कालिन एसपी रमेश बस्नेतले जिल्ला तानेका थिए ।

सो खबत पिछाडावर्ग महासंघले प्रदेशका तत्कालिन कानुनमन्त्री ज्ञानेन्द्र कुमार यादवसँग राखेको मागमा त्यतिबेला प्रहरी नीरिक्षक (ईन्सपेक्टर) रहेका अहिले डिएसपी रहेका रामकुमार यादवमाथि घटनामा सँलग्नताको शंका जाहेर गर्दै अविलम्ब कारवाहीको माग गरेको थियो ।

प्रहरी कर्मचारीलाई सकारात्मक प्रभाव पार्ने तथा भविष्यमा उत्प्रेरणा दिने भनेर प्रोत्साहन स्वरुप यादवलाई अहिले सम्मान गरिएको एसपी सापकोटाले बताए । उनले विगतको कार्यलाई नभई वर्तमानको कार्यलाई मूल्याँकन गर्दै मात्र पुरस्कृत गरिएको बताए ।