मधेशमा लोसपा र एमाले जितेको स्थानीय तहमा तालमेल गर्ने गठबन्धनको निर्णय

न्यूज ब्यूरो, जनकपुरधाम । संघीय नेपालको मधेश प्रदेशमा चुनावी माहौललाई मध्यनजर गर्दै विभिन्न पालिकाहरुमा तालमेलको कसरत जारी राखिएको छ ।

सत्ता गठबन्धनको पाँच दलले मधेश प्रदेशमा आगामी बैशाख ३० गते तोकिएको स्थानीय तहको चुनावमा तालमेल गरी चुनाव लडने निर्णय गरेको हो ।

मधेश प्रदेशमा नेकपा एमाले र लोकतान्त्रिक समाजवादी पार्टी (लोसपा) जितेका गाउँ/नगर पालिकामा सत्तारुढ पाँच दलले गठबन्धन बनाएर निर्वाचनमा जाने निर्णय गरेको छ ।

सोमबार जनकपुरमा बसेको सत्तारुढ पाँच दलका प्रदेश स्तरिय नेताहरुको बैठकमा वैशाख ३० गते हुने निर्वाचनमा ती पालिकाहरुमा गठबन्धन गर्ने निर्णय भएको हो ।

बैठकमा सहभागी कांग्रेस प्रदेश कोषाध्यक्ष प्रदिप यादवका अनुसार बाँकी पालिकाहरुमा आवश्यक्ता अनुसार गठबन्धन गर्ने सत्तारुढ दलहरु सहमत भएका छन् ।

‘प्रदेशभरमा लोसपा र एमाले जितेका ३३–३४ पालिकाहरुमा जसरी पनि गठबन्धन गर्ने र बाँकी पालिकाहरुमा आवश्यक्ता हेरी गठबन्धन गर्न हामी सहमत भएका छौँ,’ उनले भने ।

अन्य पालिकाहरुमा भने सत्तारुढ दलहरुबीच प्रतिष्पर्धा हुनेछ । कांग्रेस नेता यादवका अनुसार गठबन्धनमा भागबण्डारे पालिकास्तरमै गठबन्धनका नेताहरुले निर्णय लिनेछन् ।

गठबन्धन कुन पालिकामा आवश्यक रहेकोबारे पाँचवटै दलका जिल्ला सभापतिले सोमवार रिर्पोट बुझाउने र मंगलवार हुने प्रदेशस्तरीय नेताहरुले निर्णय गर्ने कार्ययोजना रहेको कांग्रेस कोषाध्यक्ष यादवले बताए ।

चुनावी तालमेलको लागि पाँच दलका नेताहरुले कुन पालिकामा कसरी र कसलाई उम्मेदवार बनाउने कसरतमा समेत देखिएका छन् । यद्यपी केन्द्रबाट तालमेल र गठबन्धनको लागि कुनै ठोस निर्णय अझै गर्न सकेको छैनन् ।