साहुजी भगौडा भएपछि जसपाका युवा नेता यादवलाई जेल

न्यूज ब्यूरो, जनकपुरधाम । जनकपुरमा साहुजीबाट लिएको पैसा साहुजीलाई तिरेपनि जसपाका एक युवा नेतालाई जेल चलान भएको दाबी परिवारजनले गरेको छ ।

जनता समाजवादी पार्टी (जसपा) नेपालको जनकपुरका युवा नेता नविन यादवलाई जेल चलान भएको हो । साहुजीबाट लिएको ऋण तिरेपनि उनलाई जेल चलान भएको दाबी परिवारजनले गरेको छ ।

हँसपुर नगरपालिका वडा नम्बर ८ बस्ने साहुजी अरबिन्द साह बाट जसपाका पार्षद सदस्य समेत रहेको युवा नेता यादवले ऋण लिएका थिए ।

लेनदेनको मुद्दामा बिगो प्रकरणमा यादवलाई जेल भएको जिल्ला प्रहरी कार्यालय धनुषाले जनाएको छ । अन्य साहुजीबाट लिएको रकम समयमा नबुझाएको भन्दै उनीमाथि मुद्दा परेको थियो ।

यादवलाई एक वर्ष कैद वा ५ लाख रुपैयाँ विगो सहितको माग गर्दै लेनदेन मुद्दामा धनुषा जिल्ला अदालतमा मुद्दा परेपछि केही दिनअघि पक्राउ गरिएको थियो ।

बिगो माग गरिएपनि यादवले विगो सहितको रकम नतिरेपछि उनलाई अदालतले एक वर्षका लागि जेल चलान गर्ने फैसला सुनाएको जिल्ला प्रहरी कार्यालय धनुषाका प्रहरी प्रवक्ता जीतेन्द्र बस्नेतले जानकारी दिए ।

यता, नेता यादवको परिवारले साहुजीबाट लिएको रकम तिरिदिएपनि उनलाई जेल चलान भएको दाबी परिवारजनले गरेको छ । ऋण लिएको साहुजीबाट ११ लाख रुपैयाँ तिरेर मुद्दा उठाउने व्यवहारिक सहमति भएको नविनकी श्रीमतिले बताइन् ।

अदालतबाट ३५ लाख रुपैयाँको बिगो भएको बताउँदै ११ लाख रुपैयाँ तिरेर मेलमिलाप गरी आपसी सहमति गरिएको दाबी नविनको परिजनले गरेको छ । । तर मुद्दा दिने व्यक्ति अरबिन्द साह आफैँ विदेश भागेपछि यादवलाई जेल जानु परेको गुनासो गरिएको छ ।

दुवै परिवारबीच लेनदेनको मुद्दामा आपसी समझदारी भएको थियो । साहुजीलाई रकम दिएको तथा निवेदक बिदेश नै भागेपछि यादवले पैसा तिरेर पनि जेल जानु परेको गुनासो परिवारजनको छ ।