कमला बचाउ अभियानी यादवले भारतमा 'जल प्रहरी' को सम्मान पाउने

न्यूज ब्यूरो, जनकपुरधाम । कमला बचाउ अभियानका सँयोजक एवम् कमला अभियानी विक्रम यादवलाई छिमेकी मुलुक भारतमा जल प्रहरीको सम्मानबाट सम्मानित गरिने भएको छ ।

आउँदो मार्च ३० मा भारतको राजधानी दिल्लीमा हुने एक समारोहबीच यादवलाई जल प्रहरीको सम्मानबाट सम्मानित गर्ने सूचिमा नाम परेको छ ।

अभियानी यादवलाई भारतीय मन्त्री गजेन्द्रसिँह शेखावतले सम्मान गर्ने कार्यक्रम रहेको छ । पवित्र नदी मानिएको धनुषा र सिरहा जोडने कमला नदी बचाउको लागि प्रयासरत अभियानी यादवलाई जल बचाउको लागि थालेको प्रयास स्वरुप उनलाई जलप्रहरीको सम्मान दिने भएको छ ।

भारतीय प्रधानमन्त्री नरेन्द्र मोदीले जल आत्मनिर्भर बनाउने आह्वान गरेका छन् । सोही क्रममा बर्ष २०२२ मा जल प्रहरी सम्मान समारोहको आयोजना गरी जल बचाउने अभियानीहरुलाई सो सम्मान दिने भएको छ ।

सो समारोहमा विभिन्न तवरबाट जल संरक्षणको लागि अभियन्ताको रुपमा कार्य गर्दै आएका अभियानीहरुलाई भारतको जलशक्ति मन्त्रालयका मन्त्री गजेन्द्र सिँह शेखावतले सम्मान गर्ने भएको हो ।

अभियानी विक्रम यादव कमला नदीको अस्तित्व बचाउ, चुरे जँगल बचाउ, पानी बचाउ अभियानको लागि निरन्तर लागिरहेका छन् ।