धनुषाका एसपी कडा भएपछि यसपालीको होलीमा भएन कुनै घटना

न्यूज ब्यूरो, जनकपुरधाम । धनुषा प्रहरी यसपालीको होलीमा कडाई गरेपछि जिल्लाभरिको अवस्था समान्य रिपोर्ट गरिएको छ ।

धनुषा जिल्लाभरिको रिपोर्ट अनुसार, छिटफुट ठाउँमा समान्य झै–झगडा भएपनि कुनै अप्रिय घटना नभएको हो । होलीमा मादक पदार्थ सेवन गरी प्रत्येक बर्ष कुनै न कुनै अपराधिक घटना हुँदै आएकोमा यसपाली समान्य भएको छ ।

जिल्ला प्रहरी कार्यालय धनुषाका प्रहरी उपरीक्षक (एसपी) बसन्त रजौरेले होलीमा डिजे जफ्त गरिने, मादक पदार्थ सेवन गरी गाडी चलाउनेलाई होल्ड गरिने, ग्रामिण भेगमा समेत ट्राफिक प्रहरी परिचालन गरिने भनेपछि धनुषामा होलीमा पनि अवस्था समान्य भएको हो ।

होलीमा सामुहिक झगडा, मोटरसाईकल दुर्घटना, पुरानो रिसबीको निहुँमा झगडा गर्ने प्रवृति यसपाली भने देखिएनन् । विगत केही बर्षदेखि होलीमा चर्को साउण्डमा डिजे बजाउने, अश्लिल खालको गीतहरु बजाएर गाउँ घुम्ने जस्ता क्रियाकलाप शून्य देखिएको हो ।

शुक्रबार ग्रामिण भेकमा मनाईएको होली पर्वमा एकआध बाहेक कुनै पनि ठाउँमा डिजे निकालिएनन् । एसपी रजौरेले होलीमा डिजे निकालेर बजाए डिजे बाजा नै जफ्त गरिने प्रतिक्रिया दिएपछि डिजेबालाहरु डरले पनि डिजे निकालेनन् ।

मोटरसाईकलमा तीनचार जना बसेर समाजलाई हानी हुने गरी मोटरसाईकल चलाउने कैयौँ घटना हुँदै आएकोमा यसपाली भने शून्य देखिएको हो । होलीमा सवारी दुर्घटना पनि शून्य भएको छ ।

यसको साथै, जथाभावी रँग लगाउने, पक्का रँग लगाउने, ईच्छा विपरित अरुलाई लगाउने जस्ता क्रियाकलापमा पनि शून्यता रिपोर्ट गरिएको जिल्ला प्रहरी कार्यालय धनुषाले जनाएको छ ।

जिल्ला प्रहरी कार्यालय धनुषाका अनुसार, शुक्रबार र शनिबार दुई दिनसम्म मनाईएको होलीमा अहिलेसम्म त्यस्तो कुनै घटनाको रिपोर्ट नआएको जनाएको छ ।