लाईसेन्सको अनलाईन फाराम भोलीदेखि बन्द हुँदै

न्यूज ब्यूरो, जनकपुरधाम । सवारी चालक अनुमति पत्र (लाईसेन्स) को अनलाईन फाराम भोलीदेखि बन्द हुने सूचना जारी गरिएको छ ।

यातायात व्यवस्था विभागले सोमबार एक सूचना जारी गर्दै पुरानो आवेदनलाई यथाशिघ्र कारवाही गर्नुपर्न भएकोले नयाँ लाईसेन्सको लागि सँचालनमा रहेको अनलाईन फाराम भोली चैत्त १ गतेदेखि बन्द हुने जनाएको छ ।

हालसम्म परेका अनलाईन आवेदनलाई यथाशिघ्र टुँगाउनुपर्ने भएकोले लाईसेन्सको लागि अनलाईन प्रणाली तत्कालको लागि बन्द हुने सूचना जारी गरिएको छ ।

यातायात व्यवस्था विभागका सूचना अधिकारी डा. लोकनाथ भुसालद्धारा हस्ताक्षरित सूचनामा पुरानै अनलाईन आवेदनको लोड अधिक भएको कारण नयाँ लाईसेन्सको आवेदन अनलाईन प्रणाली बन्द हुने जनाएको छ ।

अनलाईन प्रणालीबाट दैनिक रुपमा भारी सँख्यामा अनलाईन आवेदन आउने गरेको कारण पुरानो आवेदनमाथि कारवाहीमा अधिक ढिलाई भएको कारण तत्काल नयाँ लाईसेन्सको लागि अनलाईन प्रणाली बन्द गरिने भएको छ ।

विभागले यसबाट सेवाग्राहीमा पर्न जाने असरप्रति क्षमायाचना समेत गरेको छ । कोरोनाको कारण पनि बन्द रहेको नयाँ लाईसेन्सको आवेदन केही महिनाअघि मात्र खुल्ला गरिएको थियो ।