परिक्रमाको धार्मिक लस्कर आज गिरिजास्थानमा, भोली मटिहानी पुग्ने

न्यूज ब्यूरो, जनकपुरधाम । मधेशको महाकुम्भ मानिने धार्मिक पदयात्रा माध्यमिकी परिक्रममा आज तेस्रो दिन गिरिजास्थान पुगेको छ ।

पहिलो दिन फागुन औँसीका दिन जनकपुरबाट प्रारम्भ हुने परिक्रमाको पहिलो बिसौनी हनुमाननगर (कुवा) विश्राम गरी दोस्रो दिन भारतको कल्याणेश्वर पुगेको थियो ।

शनिबार विहानै भारत बिहारको गिरिजास्थानमा धार्मिक लस्कर विश्राम गर्ने भएको छ । स्थानीयस्तरमा फूलहर नामले चिनिने यो ठाउँमा सीताजीले फूल टिपेर गिरिजा भगवतीको पूजा गर्ने गरेको र त्यही क्रममा भगवान् रामसँग पहिलो देखादेख भएको जनविश्वास छ ।

गौरीशङ्कर, जानकी, गिरिजा भगवती र गणेशका मूर्ति एवं कप्टहारिणी र शरसमीर पोखरीह भएको यो ठाउँबाट जमुनी नदी बगेको छ ।

यस्तै, भोली चौथौ दिन आईतबार नेपालको महोत्तरी जिल्लाको मटिहानी आईपुग्नेछ । नेपाल भारतको सीमासँगै रहेको धार्मिक नगरी मटिहानीमा परिक्रमाको धार्मिक लस्कर भोली विश्राम गर्नेछ ।

महोत्तरी जिल्लामा पर्ने मटिहानी पूरातात्विक महत्वका १२ वटा मन्दिर तथा आठ वटा पोखरी भएको घना बस्ती हो । नेपालमा संस्कृतको पढाइ हुने ठाउँका रुपमा परिचित मटिहानीमा एउटा पुरानो संस्कृत महाविद्यालय तथा मठ छन् ।

परिक्रमाको धार्मिक लस्करको लागि नेपाल प्रहरीले समेत सुरक्षा दिने गरेको छ । धार्मिक लस्करको मोटो भीडमा कुनै अप्रिय घटना नहोस भन्ने उदेश्यले सुरक्षाकर्मी समेत परिचालन गरिएको हुन्छ ।