धनुषामा काँग्रेसको त्रिपक्षित भीडन्त

न्यूज ब्यूरो, जनकपुरधाम । नेपालको ठुलो पार्टीको रुपमा रहेको नेपाली काँग्रेसको जिल्ला अधिवेशनको लागि धनुषामा तीन जना उम्मेदवारले नेतृत्वमा मनोयन दर्ता गराएको छ ।

नेपाली काँग्रेसको १४ औँ महाधिवेशनअन्तर्गत भोली शुक्रबार हुने निर्वाचन प्रक्रियाको लागि विहिबार अध्यक्षको लागि तीन जनाले उम्मेदवारी दर्ता गराएका छन् ।

विहिबारबाटै सुरु भएको चुनावी प्रक्रिया अन्तर्गत जिल्लामा काँग्रेसको लागि प्रभावशाली मानिएको दुई नेता तथा काँग्रेसमा न्यून प्रभाव रहेको अन्य एक नेताले सभापति पदका लागि उम्मेदवारी दर्ता गराएका छन् ।

संस्थापन पक्षबाट वर्तमान जिल्ला उपसभापतिसमेत रहेका सन्तोष यादवले सभापति पदमा मनोनयन दर्ता गराएका छन् भने संस्थापन इतर समूहबाट सभापतिका लागि क्षीरेश्वरनाथ नगरपालिकाका मेयरसमेत रहेका योगेन्द्र पँजियार र संविधानसभा सदस्यसमेत रहेका दिनेश प्रसैला यादवले उम्मेदवारी दर्ता गराएका छन् ।

मेयर योगेन्द्र पजियार विमलेन्द्र निधि गुटका हुन भने प्रसैला शेखर कोइराला गुटका छन् । नेता सँतोष यादव र मेयर पजियार धनुषामा अध्यक्षको लागि प्रभावशाली मानिएको छ । दिनेश प्रसैला (यादव) भने न्यून प्रभावी रहेका छन् ।

भोली हुने चुनावी प्रक्रियाको लागि जिल्ला कार्य समितिको उपसभापतिका लागि ६ जनाले उम्मेदवारी दर्ता गराएका छन् ।

उपसभापतिका लागि गणेश प्रसाद जयसवाल, हरिशंकर साह, राम सोभित दाहा (धानुक), सुरेन्द्र प्रसाद चौधरी (मुन्ना), गणेश झा र लक्ष्मीनारायण यादवले मनोनयन दर्ता गराएको निर्वाचन समितिले जनाएको छ ।

यसैगरी, सचिव पदमा ९ जनाले उम्मेदवारी दिएका छन् । निर्वाचन समितिका अनुसार नरेश यादव, श्याम चन्द्र यादव, नवल किशोर यादव, प्रभाकर झा, केवल ठाकुर (शर्मा), धिरेन्द्र मोहन झा, शिवशंकर कुमार गोइत, दिपेन्द्र कुमार भडखेर र कन्हैया कुमार कर्णले उम्मेदवारी दिएका छन् ।

सहसचिवमा धर्मनाथ यादव, सुरेश कोइराला, महेश कुमार बस्नेत, इन्द्र कुमार महतो, विजय कुमार यादव र मो। साकिर राइनलगायत ६ जनाले उम्मेदवारी दिएका छन् ।

जिल्लामा नयाँ नेतृत्वका लागि सर्वसम्मत हुन नसकेपछि चुनावी प्रक्रियाबाट नेतृत्व चयन हुन लागेको छ ।

निर्वाचमा ५१ प्रतिशत मत ल्याउने उम्मेदवारले चुनाव जित्ने छन् । यस्तै ५१ प्रतिशतभन्दा कम मत ल्याएमा अथवा बराबर मत ल्याएमा दोस्रो पटक निर्वाचन हुने निर्वाचन समितिले जनाएको छ ।