कमला नगरपालिकामा महिलाहरुको आङ खस्ने तथा पाठेघर क्यान्सर जाँचसम्बन्धी शिविर सम्पन्न

न्यूज ब्यूरो, जनकपुरधाम । पूर्वी धनुषाको कमला नगरपालिकास्थित महिलाहरुको आँङ खस्ने तथा पाठेघर मुखको क्यान्सर चेकजाँच, उपचार तथा स्क्रीनिँग सम्बन्धी एकदिने निःशुल्क शिविर सम्पन्न भएको छ ।

कमला नगरपालिकाको आयोजनामा कमला नगरपालिका वडा नम्बर ९ दुबरकोट हथलेटवा स्वास्थ्यचौकीमा आयोजित सो निःशुल्क शिविरमा करिब अढाई सय जना महिलाहरुले सेवा पाएका छन् ।

महिलाहरुमा गाउँस्तरमा देखापर्ने आँङ खस्ने समस्या तथा पाठेघरको मुखको क्यान्सरबाट मुक्तीको लागि कमला नगरपालिकाले सो निःशुल्क शिविर आयोजना गरेको थियो ।

जनकपुरको प्रादेशिक अस्पतालका महिला रोग विशेषज्ञ डा. ईन्द्रजीत रजक, डा. हिमालय प्रसाद यादव लगायतको अनुभवी डाक्टरहरुद्धारा महिलाहरुलाई निःशूल्क चेकजाँ गरिएको हो ।

स्थानीय सरकार गठन भएपछि कमला नगरपालिकामा प्रथम पटक आँङ खस्ने तथा पाठेघरको मुखको क्यान्सर सम्बन्धी शिविर नभएको खण्डमा पहिलो पटक सो शिविर गरिएको हो ।

स्थानीयस्तरमा महिलाहरुमा खासगरी सेतो पानी बग्ने लगभग शतप्रतिशत महिलाहरुमा समस्या देखिएको कमला नगरपालिकाको स्वास्थ्य शाखाका सँयोजक रामकुमार ठाकुरले जानकारी दिए ।

ठाकुरका अनुसार, शिविरमा २ सय ४५ जनाको चेकजाँचको क्रममा २१ जना महिलामा आँग खसेको र उनीहरुको शल्यक्रिया गर्नुपर्ने अवस्था देखिएको हो ।

यस्तै, चेकजाँचमध्ये बाँकी महिलाहरुमा सेतो पानी बग्ने र पाठेघर सम्बन्धी अन्य समस्या भएको पाइएको बताइएको छ । आँङ खस्ने महिलाहरुको अपरेशन जनकपुरको प्रादेशिक अस्पतालमा निःशूल्क गरिने सँयोजक ठाकुरले जानकारी दिए ।

तराई मधेशमा लोकलाजको कारण महिलाहरुमा देखापर्ने समस्या समयमा बाहिर नआउँदा समस्या झन गम्भिर हुँदै गएको स्वास्थ्य शाखाका सहसँयोजक अमरेश कुमार यादवले जानकारी दिए ।

चेकजाँचको क्रममा कमला नगरपालिकाद्धारा निःशुल्क औषधी समेत वितरण गरिएको जनाइएको छ । स्वास्थ्य कार्यालयबाट सिफारिस भएपछि शल्यक्रिया गर्नुपर्ने महिलाहरुलाई यातायातको सुविधा मिलाएर जनकपुर पठाउने तयारी गरिएको हो ।

शल्यक्रियाको लागि जनकपुर जाने महिलाहरुको लागि अस्पतालमा खाना बस्ने समेत निःशुल्क हुने जनाईएको छ । आईतबार सम्पन्न शिविर विहान १० बजेदेखि अपरान्ह ६ बजेसम्म सँचालन भएको थियो ।

स्वास्थ्य कार्यालय धनुषाको समन्वयमा सो कार्यक्रम सम्पन्न भएको हो ।

शिविरमा नगरभरिको महिला स्वयँसेविका, स्वास्थ्यका कर्मचारीहरु, जनप्रतिनीधिहरु, राजनीतिक दलका प्रतिनीधिहरु, समाजसेवी, युवा, सुरक्षाकर्मी, क्लब, स्वास्थ्य चौकी प्रमुख लगायतका सम्पूर्ण पक्षको उपस्थिति रहेको थियो ।