भोलीदेखि पुनः राजमार्ग जाम, राजमार्गमै खाना बनाइने

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीले जारी राखेको किसान आन्दोलनको क्रममा भोलीदेखि पुनः राजमार्ग जाम हुने भएको छ ।

विगत सवा महिनादेखि निरन्तर जारी रहेको किसान आन्दोलनलाई निरन्तरता दिँदै जनमत पार्टीले सरकारलाई दबाब दिन भोली विहिबारदेखि पूर्वपश्चिम राजमार्गमै धर्ना दिएर राजमार्ग जाम गर्ने बताइएको छ ।

आन्दोलनकारी किसानहरुको माग अझै सरकारले सम्बोधन नगरेको भन्दै भोलीदेखि निरन्तर राजमार्गमा चक्काजाम गर्ने कार्यक्रम सार्वजनिक गरेको हो ।

भोलीदेखि २४ सै घण्टा राजमार्गमा चक्काजाम राख्ने कार्यक्रम अघि सारेको हो । उनीहरुले बिहानदेखि रातभरि पनि चक्काजाम राख्ने भनिएको छ । राजमार्गमा चल्ने सवारी साधानलाई अवरोध गर्ने भएको छ ।

आन्दोलनको क्रममा एम्बुलेन्स, पत्रकार, अधिकारकर्मी, शव–वाहन, स्कूल बसलाई कुनै रोकटोक नहुने जनाइएको छ । यी क्षेत्रका जुनसुकै सवारीलाई कुनै प्रकारको अवरोध नगरिने जनमत पार्टीले जनाएको छ ।

किसानहरुले मलखाद सहज उपलब्धता, किसानलाई परिचय पत्र, किसानलाई पेन्सन, सिँचाईमा बिजुली बिल निःशुल्क गर्नुपर्ने लगायतका मागहरु राखी विगत सवा महिनादेखि निरन्तर आन्दोलनमा रहेपनि सरकारले चासो लिएका छैनन् ।

सवा महिनादेखि नै किसानहरुले निरन्तर आन्दोलन गरेपनि सरकारले चासो नलिएपछि उनीहरुले बाध्य भएर पुनः राजमार्ग जामको घोषणा गरेको हो ।