नक्कली PCR रिपोर्ट बनाउने जनकपुरका दुई जना सहित चार दलाल काठमान्डौँमा पक्राउ

न्यूज ब्यूरो, जनकपुरधाम । अस्पतालमा नक्कली पिसिआर रिपोर्ट बनाउने धनुषाका दुई जना सहित चार जनालाई प्रहरीले काठमान्डौँमा पक्राउ गरेको छ ।

भक्तपुर जिल्लाको मध्यपुर ठिमीमा रहेको नागरिक कम्यूनिटी टिचिँग हस्पिटल लिमिटेड र काठमान्डौँको तिनकुनेस्थित रहेको कान्तिपुर अस्पताल प्रा.लि. बाट बैदेशिक रोजगारीमा जानेहरुको नक्कली पिसिआर रिपोर्ट बनाउने खुलेपछि चार जनालाई पक्राउ गरिएको हो ।

वैदेशिक रोजगारीमा जाने व्यक्तिहरुलाई आवश्यक पर्ने पिसिआर रिपोर्टको लागि स्वाब नै नलिई रकम लिएर उनीहरुको पिसिआर रिपोर्ट नक्कली बनाउने गरेको गोप्य सूचनाको आधारमा प्रहरीले चार जनालाई पक्राउ गरेको हो ।

पक्राउ पर्नेहरुमा मधेश प्रदेशको धनुषा जिल्लाको विदेह नगरपालिका वडा नम्बर ४ का बर्ष २५ को रोशन कुमरा छिट्टान, क्षीरेश्वरनाथ नगरपालिका वडा नम्बर १ बस्ने बर्ष २५ को नागेन्द्र यादव रहेका छन् । उनीहरुमध्ये छिट्टान अहिले काठमान्डौँको ग्वार्कोमा बस्दै आएका छन् भने यादव गौशालामा बस्दै आएका छन् ।

उनीहरुको साथै काभ्रेपलान्चोक जिल्लाको तेमाल गाउँपालिका वडा नम्बर ५ बस्ने माधव मैनाली र सर्लाही जिल्लाको बलरा नगरपालिका वडा नम्बर ७ बस्ने नागरिक ल्याब हस्पिटल प्रा.लि.का प्रबन्धक समेत रहेका प्रसन्न कुमार झा समेत रहेका छन् ।

मँगलबार बिहान करिब १०ः३० बजेको समयमा त्रिभुवन एयरपोर्ट अगाडीबाट चारै जनालाई पक्राउ गरेको हो । नक्कली पिसिआर रिपोर्ट बनाइदिने भन्ने सूचनाको आधारमा उनीहरुलाई नागरिक कम्यूनिटी टिचिँग हस्पिटल लिमिटेडबाट जारी भएको परिचय पत्रसहित सोही अस्पतालबाट ८ थान नक्कली पिसिआर रिपोर्ट सहित एयरपोर्ट अगाडीबाट पक्राउ गरिएको हो ।

सोही हस्पिटलका प्रबन्धक झा हस्पिटलबाटै पक्राउ परेका छन् भन कान्तिपुर अस्पताल प्रा.लि.का परिचय पत्र बोकेको नागेन्द्र यादवको साथबाट १७ थान नक्कली पिसिआर रिपोर्ट सहित अस्पतालको अगाडीबाट पक्राउ गरिएको हो ।

कान्तिपुर अस्पतालमा काम गर्ने माधव मैनालीलाई पिसिआर टेष्ट नै नगरी पिसिआर नेगेटिभ उल्लेख भएको ४ थान नक्कली पिसिआर रिपोर्ट सहित पक्राउ गरिएको प्रहरीले जनाएको छ ।

उनीहरुलाई टेकु अस्पतालको प्रतिनीधिहरुको रोहबरमा ल्याबबाट पिसिआर रिपोर्ट जेनेरेट गर्न प्रयोग गरिएको कम्प्यूटर लगायतका पिसिआर टेष्ट दर्ता रजिष्टरहरु समेत नियन्त्रणमा लिइएको हो ।

यता, दुवै ल्याबका भावेश मिश्र र निर्मल गिरी तथा पिसिआर रिपोर्टमा दस्तखत गर्ने ल्याब चिकित्सकहरु फरार रहेको र उनीहरुको खोज तलास गरिरहेको बताइएको छ ।

प्रारम्भिक अनुसन्धानबाट उनीहरुले उक्त ल्याबमा कार्यरत भनिएका विशेषज्ञ चिकित्सकहले रिपोर्ट नै नहेरी आफ्नो डिजिटल हस्ताक्षर प्रयोग गरी रिपोर्ट दिने गरेको पाइएको छ ।

पिसिआर पोजिटिभ समेत देखिएका रिपोर्टमा सिटी भ्यालू तलमाथि गरी नेगेटिभ रिपोर्ट दिने गरेको तथा ती दलालहरुले अस्पतालको कर्मचारी भन्दै सामुहिक रुपमा स्वाब सँकलन गरी ल्याबमा दिने गरेको खुलेको छ ।

उनीहरुले एक रिपोर्टको लागि १० हजार रुपैयाँसम्म लिने गरेको खुलेको छ । क्यूआर कोडबाट स्क्यान गरी समेत हेर्न मिल्ने गरी सक्कली जस्तै रिपोर्ट बनाउने गरेको पाईएको छ ।