नेपाल रेल्वे कार्यालयमा कर्मचारीहरुले हाने ताला

न्यूज ब्यूरो, जनकपुरधाम । पुरानो कर्मचारीलाई स्थापनाको माग गर्दै आन्दोलनरत कर्मचारीहरुले नेपाल रेल्वेको जनकपुरधामस्थित कार्यालयमा तालाबन्दी गरेको छ ।

रेल्वे कम्पनी लिमिटेडअन्तर्गत ज्यालादारीमा काममा खटाउने भनिएका १५१ जना कर्मचारीलाई बिनाजानकारी हटाएर नयाँलाई नियुक्त गरी तालिम दिन थालिएपछि पुराना कर्मचारीहरु आन्दोलित भई तालाबन्दी गरेको हो ।

रेल्वे कर्मचारी संघर्ष समितिले जनकपुरधामस्थित नेपाल रेल्वे कम्पनीको कार्यालयमा तालाबन्दी गरेको छ । कर्मचारीहरुले तालिम दिइएको पुरानो कर्मचारीलाई स्थापनाको माग गर्दै आएको छ ।

करिव दुई हप्तादेखि धर्ना, प्रदर्शन गर्दै आए पनि सुनुवाइ नहुँदा बाध्य भएर तालाबन्दी गरेको आन्दोलनरत कर्मचारीमध्ये ईन्द्रजीत गोईतले बताए ।

उनले आफूहरूले प्रमुख जिल्ला अधिकारी सुरेन्द्र पौडेललाई ज्ञापनपत्रसमेत बुझाएको र सो सम्बन्धमा प्रजिअ पौडेलले रेल्वेका महाप्रबन्धक निरञ्जन झालाई कोरोना संक्रमण भएको भन्दै समस्या समाधान गर्न आलटाल गरिरहेको दुखेसो सुनाए ।

महाप्रबन्धक झाले ५५ जना नयाँ कर्मचारीलाई नियुक्त गरी तालिम दिन थालेपछि पुराना कर्मचारी आन्दोलित भएका छन् ।

नेपाल रेल्वेलाई कानुनी तथा प्राविधिक कारण देखाइ जयनगर–कुर्था खण्डमा नियुक्त भएका कर्मचारीलाई एक्कासि सूचना निकालेर नवनियुक्त महाप्रबन्धक झाले हटाएपछि उनीहरूले आफूहरूलाई पुनः समायोजन गर्न माग गरेका छन् ।

पछिल्लो पटक सहायक स्टेशन मास्टरको तालिम लिएका इन्द्रजित गोइतले आफूहरूलाई कुनै जानकारी नै नदिई नवनियुक्त महाप्रबन्धक झाले आफूअनुकूलका पार्टीका कार्यकर्तालाई नियुक्त गरी तालिम दिन लागेको आरोप लगाए ।

उनले गोप्यरूपमा तालिम दिएर आफ्ना नजिकका व्यक्तिहरूलाई राख्नु आफूहरूका लागि असह्य रहेको समेत जिकिर गरे । उनले यसअघि आफूहरूले पनि एक महिनाको तालिम लिएको र आफूहरूको भुक्तानीसमेत बाँकी रहेको बताए ।

प्रबन्धक झाले कामै नगरी ज्यालादारी कर्मचारीले ज्याला पाउने कानुनी प्रावधान नरहेकोले उनीहरूलाई आफूले हटाएको स्वीकार गरेका छन् ।