साउदीमा हत्या अभियोग लागेका सिरहाका मण्डल सजायमुक्त, उमेशको लागि पनि पहल हुँदै

न्यूज ब्यूरो, सिरहा, १२ चैत्र । बंगाली सहकर्मीको हत्या अभियोगमा सजाय सुनाइएका लग्दी गदियानी–९ सिरहाका सुरेश मण्डललाई साउदी अरबको अदालतले सजायमुक्त गरेको छ । ९ वर्षअघि सडकमा माटो सम्याउने क्रममा मण्डलले चलाएको गाडीले ठक्कर दिँदा बंगाली सहकर्मी रफिकुल इस्लामको ज्यान गएको थियो ।

अदालतले तोकेको ब्लडमनी (दिया रकम) नलिई पीडित परिवारले माफी दिएपछि सुरेश गत बुधबार सजायमुक्त भएका हुन् ।

‘माटो सम्याउँदा अगाडि रहेका इस्लामलाई देखिनँ । त्यो दुर्घटना अन्जानमा भएको थियो,’ मण्डलले न्यूज ब्यूरोलाई भने, ‘काम गर्ने क्रममा भएको दुर्घटनामा जिम्मेवारी लिनुपर्‍यो । मेरो अनुरोधलाई इस्लामको परिवारले ब्लडमनी नलिने निर्णय गरेपछि मैले न्याय पाएँ ।’

अदालतले पीडित परिवारलाई तीन लाख रियाल दिनुपर्ने फैसला सुनाएको थियो । साउदीस्थित नेपाली दूतावासले मण्डलका पक्षमा अदालतमा लड्दै आएको थियो । दूतावासको अथक प्रयासपछि उनी सजायमुक्त भएको नेपाली दूतावासका निमित्त पहिलो सचिव विजयकुमार राउतले न्यूज ब्यूरोलाई जानकारी दिए । दुर्घटना भएपछि मण्डललाई जुवेलस्थित जेलमा ७ वर्ष ६ महिना राखिएको थियो ।

इस्लामको परिवारले ब्लडमनी नलिई माफी दिँदा आफूले नयाँ जीवन पाएको र नेपाल फिर्ने बाटो खुलेको मण्डलले बताए । ‘अदालतले फैसला गरेको रकम दिन सक्ने हैसियतमा थिइनँ । दूतावास लगायत अन्य सबैको सहयोग र मेरो अनुरोधलाई इस्लामको परिवारले बुझिदिए,’ उनले भने ।

उनले साउदी अदालतले फैसला गरेको ३ आख रियाल ब्ल्डमनी बंगाली परिवारद्वारा माफी गराउनमा नेपाली दूतावासले अहम् भुमिका खेलेको भन्दै दूतावासप्रति आभार प्रकट गरे ।

कम्पनीले मण्डलको जिम्मेवारी लिएपछि २२ महिनाअगाडि मात्रै जेलबाट निकाली काममा लगाउँदै आएको थियो । ‘अहिले लेबर काम गर्दै आइरहेको छु । कम्पनीसँग ७ वर्षको तलब दिनुपर्छ भनेर माग गरिरहेको छु । दिन्छु भन्ने प्रतिबद्धता पनि गरेको छ,’ उनले भने ।

मण्डल पुन: कम्पनीमै कार्यरत छन् । ‘म आरसीसी कम्पनीमा आएको थिएँ । आरसीसी कम्पनीका मालिकको मृत्यु भएपछि छोराको कम्पनी इन्सामा लेबर काम गरिरहेको छु । ८ सय रियाल तलब दिन्छ,’ उनले भने, ‘मेरो प्रार्थनापछि घर जान पाउने अवस्था आयो । त्यसका लागि राहदानी बनाउन दूतावासमा निवेदन दिएको छु । राहदानी बन्नासाथ बिदामा नेपाल आउँछु ।’

मण्डलका चार छोराछोरी, श्रीमती र बुबाआमा छन् । ‘जेठी छोरीको उमेर १९ वर्ष भयो । १२ वर्षका जुम्ल्याहा छोरा छन् । ९ वर्षकी छोरी छिन्,’ उनले भने, ‘म साउदी आएको तीन महिनामा कान्छी छोरीको जन्म भएको हो । उसलाई त देखेको पनि छैन ।’

यसैबीच, न्यूज ब्यूरोका सिरहा प्रमुख पत्रकार बिनय यादवले दूतावासका पहिलो सचिव राउतसँग यतिबेला नेपालको जल्दोबल्दो मुद्दाको रुपमा रहेको विगत १२ वर्षदेखि साउदी अरबको जेलभित्र जेली जीवन बिताइरहेका धनुषा कमला नगरपालिका ३ का ३७ वर्षीय उमेश यादवको सन्दर्भमा कुरा गर्दा उनको लागि पनि पहल भइरहेको अश्वासन दिए ।

न्यूज ब्यूरो डिजिटल पत्रीकाले उमेशबारे सम्प्रेषण गरेको समाचार अहिले विभिन्न सञ्चार माध्यममा उत्तिकै भाइरल भएको छ । विभिन्न निकायहरूले पनि उनको लागि पहल थालिसकेका छन् । आउँदो अप्रीलमा उमेशको अन्तिम अदालती पेशी हुन गइरहेको बताइएको छ ।