दिलिप महतोलाई शहिद घोषणा गर्न युथ एशोसिएशनले मन्त्रीलाई बुझायो ज्ञापन

न्यूज ब्यूरो, जनकपुरधाम । गत वि.सं. २०७६ साल माघ २५ गते राती हत्या गरिएका पर्यावरण अभियानी भनिने दिलिप महतोलाई शहिद घोषणाको लागि युथ एशोसिएशन नेपालले ज्ञापन पत्र बुझाएको छ ।
धनुषा जिल्ला मिथिला नगरपालिका वडा नम्बर ५ श्रीपुर बस्ने राम जीवन महतोको २४ वर्षीय छोरा ओमप्रकाश महतो (दिलिप) लाई अझै शहिद घोषणा नगरिएको भन्दै वन तथा वातावरण मन्त्री राम सहाय यादवलाई ज्ञापन पत्र बुझाएको हो।

युथ एसोसिएशनकाका अध्यक्ष राहुल यादवको नेतृत्वको गएको युवाहरुको टोलीले मन्त्री यादवलाई विहिबार ज्ञापन पत्र बुझाएको हो । पर्यावरणको रक्षार्थ दिलिप महतो शहादत दिएको भन्दै उनलाई शहिद घोषणा गर्नको लागि ज्ञापन पत्र बुझाएको हो ।

त्यहाँस्थित उद्योग सञ्चालक विपिन लगायतले उनलाई फलामको लिभर र पेचकसले क्रूरतापूर्वक प्रहार गरेर ना ७ ख ६४१३ नं को टिपर दिलिपको टाउकोमा चढाई किचेर हत्या गरेका थिए।

एक महिनाको अनुसन्धानपछि माघ २२ मा जिल्ला अदालतमा मुद्दा दर्ता भयो । अभियोगपत्रमा दिलीपलाई यातना दिई क्रूरतापूर्वक मारेको भन्दै सात जनालाई मुलुकी अपराध संहिता २०७४ को दफा ४१ बमोजिम जीवित रहेसम्म कैद सजाय माग गरिएको छ ।

तर, अदालतले हत्या अभियोगमा पक्राउ परेका ६ जनामध्ये उद्योग सञ्चालक विपिन तथा कर्मचारीहरू मुनिन्द्र र रञ्जितलाई मात्रै मुद्दाको फैसला नहोउन्जेलसम्म थुनामा राख्न आदेश दिए। यता तीनजना रोशनकुमार, सत्यनारायण र शत्रुधन भने २५ हजार रुपैयाँ धरौटीमा छुटे।

एक वर्ष फरार रहेर अदालतमा हाजिर भएका उद्योगका अर्का सञ्चालक विनोदले साधारण तारेखमा बसे हुने गरी २०७७ असोज २६ मा जिल्ला अदालतबाटै अनुमति पाए ।

विहिबार मन्त्री राम सहाय यादव समक्ष ज्ञापन पत्र बुझाउँदै उनीहरुले उनको परिवारसँग न्याय गर्न अपिल गरेका थिए । सोही क्रममा मन्त्री यादवले दिलिपलाई शहिद घोषणाको लागि पहल गर्ने आश्वासन दिएका हुन् ।

दिपिलको आमावुवामाथि पनि क्रसर सँचालकले दिएको मुद्दाले उनको परिवारलाई असहज भएपछि उनलाई सहज पार्नको लागि अपिल गरिएको छ । मन्त्री यादवले भोली शुक्रबार नै गृहमन्त्रालयमा पत्र पठाउने आश्वासन दिँदै दिलीपको परिवारलाई सहजता प्रदान गर्ने बताए ।

युथ एसोसिएसन अफ नेपालका संस्थापक अध्यक्ष राहुलराज यादवको नेतृत्वमा चुडामणि यादव, सन्तोष बलराज यादव र सर्बजित यादवले ज्ञापन पत्र बुझाएका छन।