मधेशमा फेरी जल्यो एक ट्रक

न्यूज ब्यूरो, राजविराज । पूर्व पश्चिम राजमार्गअन्तर्गत सप्तरीमा गए राति पुनः एक ट्रकमा आगजनी भएको छ ।

सप्तरीको अग्निसाइर कृष्णसवरण गाउँपालिका वडा नम्बर ४ विशाल चोकस्थित पूर्वतर्फ गइरहेको ना ५ ख १९११ नम्वरको ट्रकमा आगजनी भएको हो ।

कुखुराको दाना बोकेर गइरहेको सो ट्रकमा राति करिब ११ बजेतिर आगजनी भएको इलाका प्रहरी कार्यालय कञ्चनपुरका प्रहरी नायव उपरिक्षक रामकुमार यादवले जानकारी दिए ।

‘कसले र किन ट्रकमा आगजनी गरेको विषयमा अनुसन्धान भइरहेको छ’ उनले भने। चालक भने सम्पर्कमा नआएको उनले बताए ।

अज्ञात समूहद्वारा गरिएको आगजनीले ट्रक पूर्ण रुपमा जलेको छ । यसअघि पुस १६ गते पनि सोही गाउँपालिका–५ महुली पुलमा एक ट्रक जलाइएको थियो ।