मधेश प्रदेशको राष्ट्रिय सभा निर्वाचन आज हुँदै, कुन पार्टीको मतभार कति ?

न्यूज ब्यूरो, जनकपुरधाम । राष्ट्रियसभा सदस्य १९ पदका लागि बुधबार हुने निर्वाचनको सम्पूर्ण तयारी पूरा भएको निर्वाचन आयोगले जनाएको छ ।

स्वास्थ्य मापदण्ड, शान्ति सुरक्षा तथा निर्वाचनस्थल र केन्द्र निर्माणलगायत गर्नुपर्ने निर्वाचन व्यवस्थापनको सम्पूर्ण तयारी पूरा भएको आयोगका प्रवक्ता शालिग्राम पौडेलले जनाएका छन् । निर्वाचनको मौनअवधि सुरु भइसकेकाले प्रचार–प्रसार रोकिएको छ ।

निर्वाचनमा खटिने सुरक्षाकर्मी, निर्वाचन कर्मचारी र स्वास्थ्यकर्मीसहितको टोलीको व्यवस्थापन भइसकेको छ ।

मुलुकका विभिन्न प्रदेशमा कायम रहेका ८ मतदानस्थल र १४ केन्द्रमा बुधबार बिहान ९ देखि दिउँसो ३ बजेसम्म मतदान हुनेछ । देशको ७ वटै प्रदेशबाट राष्ट्रिय सभामा प्रतिनिधित्व गर्ने सदस्यहरुका लागि प्रदेशगत रुपमा चुनाव भइरहेको छ ।

सबै प्रदेशमा सत्तारुढ गठबन्धनको अवस्था बलियो देखिएको छ ।प्रमुख प्रतिपक्षी दल नेकपा एमालेको राष्ट्रिय सभामा समेत ठूलो क्षति हुने संभावना छ ।

मधेश प्रदेशमा सत्तारुढ दल र विपक्षी दलबीचको मतभारमा भारी अन्तर छ । आगामी फागुन २० गते नेकपा (एमाले) का ८, नेकपा (एकीकृत समाजवादी) का ४, नेकपा (माओवादी केन्द्र) का ४ र नेपाली कांग्रेसका ३ राष्ट्रियसभा सदस्यको पदावधि समाप्त हुने भएकाले रिक्त स्थानका लागि निर्वाचन हुन लागेको हो ।

सदस्यको पदावधि समाप्त हुनु ३५ दिनअघि नै निर्वाचन गर्नुपर्ने प्रावधान छ । सङ्घीय संसद्मा प्रतिनिधित्व गर्ने ९ राजनीतिक दलका उम्मेदवार चुनावी मैदानमा छन् ।

आयोगका अनुसार नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राष्ट्रिय जनमोर्चा, लोकतान्त्रिक समाजवादी पार्टी नेपाल, नेपाल मजदुर किसान पार्टी, जनता समाजवादी पार्टी नेपाल र राष्ट्रिय प्रजातन्त्र पार्टीले निर्वाचनमा भाग लिएका छन् ।

निर्वाचनका लागि प्रदेशसभा सदस्य तथा पालिका प्रमुख र उपप्रमुख गरी कुल २ हजार २५ मतदाता कायम छ । निर्वाचनमा प्रदेशसभा सदस्यको मतभार ४८ र पालिका प्रमुख र उपप्रमुखको मतभार १८ रहेकोछ ।

निर्वाचनमा स्थानीय तहका १ हजार ४ सय ९३ र प्रदेशसभाका ५ सय ३२ मतदाता रहने छन् । निर्वाचनबाट ७ महिला, ३ दलित, २ अपाङ्गता भएका व्यक्ति वा अल्पसङ्ख्यक र ७ अन्य समूहका उम्मेदवार निर्वाचित हुनेछन् ।

प्रबुद्ध वर्गको प्रतिनिधित्व रहने ५९ सदस्सीय राष्ट्रियसभाका एकतिहाइ सदस्य प्रत्येक २ वर्षमा पदावधि समाप्त हुने सवैधानिक व्यवस्था छ । मधेश प्रदेशमा जम्मा मतभार ९ हजार ८२२ रहेको छ ।

१०४ जना प्रदेशसभा सदस्य र २७१ जना पालिकाका प्रमुख र उपप्रमुखमध्ये सत्ता गठबन्धनको मतभार ७ हजार ३०२ छ भने प्रतिपक्षी गठबन्धनको मतभार केवल २ हजार ४८४ मात्र छ ।

दुई गठबन्धनबीच ४ हजार ८१८ मतभारले फरक छ । १९ जना प्रदेश सांसद, स्थानीय तहमा ८१ जना प्रमुख र उपप्रमुख गरी काँग्रेसको मतभार २ हजार ३७० रहेको छ ।

यसरी काँग्रेसको एक्लो मतभार प्रतिपक्षभन्दा बढी छ । त्यस्तै, प्रदेशसभा सदस्य ८ जना र स्थानीय तहमा ४५ जना प्रमुख र उपप्रमुख गरी माओवादी केन्द्रको मतभार १ हजार १९४ रहेको छ ।

प्रदेशसभा सदस्य १३ र स्थानीय तहमा सात जना प्रमुख र उपप्रमुख गरी नेकपा एसको मतभार ७ सय ५० छ । त्यस्तै, प्रदेशसभा सदस्य ३९ र स्थानीय तहमा ६२ जना प्रमुख र उपप्रमुख गरी जसपाको मतभार २ हजार ९८८ छ ।

उता, प्रदेशसभा सदस्य आठ र स्थानीय तहमा ३० जना प्रमुख तथा उपप्रमुख गरी एमालेको जम्मा मतभार ९ सय २४ रहेको छ । त्यस्तै, प्रदेशसभामा १६ जना प्रदेशसभा सदस्य तथा स्थानीय तहमा ४४ जना प्रमुख तथा उपप्रमुख गरी लोसपाको मतभार १ हजार ५६० रहेको छ ।

चुनावमा प्रदेश सांसदको मतभार ४८ तथा स्थानीय तहका प्रमुख तथा उपप्रमुखको मतभार १८ तोकिएको छ । त्यसो त गठबन्धनमा नरहेका दलहरु पनि छन् मधेश प्रदेशमा ।

नेपाली जनता दलको स्थानीय तहमा दुई भोट अर्थात् मतभार ३६ रहेको छ । नेपाल संघीय समाजवादी पार्टीको एकजना प्रदेशसभा सदस्य रहेकोमा मतभार ४८ रहेको छ ।

राष्ट्रिय सभा सदस्यको निर्वाचन यही १२ माघमा निर्वाचन हुँदैछ । एमाले र लोसपा गठबन्धनमा एमालेका उम्मेदवार उसमान अन्सारी (सूर्य छाप) र महिलातर्फ लोसपाका उम्मेदवार रुपाकुमारी यादव (साईकल छाप) लाई मतदान गर्ने सहमति भएको छ ।

त्यस्तै सत्ता गठबन्धनमा माओवादी केन्द्रका उर्मिला अर्याल, जसपाका खालिद सिद्धिकीलाई मतदान गर्ने सहमति भएको छ ।

मधेश प्रदेशको मतभार
जनकपुरधाम ।मधेश प्रदेशमा राष्ट्रिय सभा निर्वाचनमा सबै भन्दा बढी मतदाता जनता समाजवादी पार्टी(जसपा)को रहेको छ ।त्यसपछि नेपाली कांग्रेसको मतभार छ ।

जसपा–२९८८

नेकां–२२६२

लोसपा–१५६०

माओवादी केन्द्र–११९४

एमाले–९२४

नेकपा एस–७५०

ने संघिय समाजवादी–४८

ने जनता दल–३६

मधेश प्रदेशमा १ सय ४ जना सांसद र स्थानीय तहका प्रमुख तथा उपप्रमुख २ सय ६९ जना रहेका छन् । प्रदेश सभासदस्यको मतभार ४८ हो । प्रमुख र उपप्रमुखको मतभार १८ हो । प्रदेश २ मा कुल मतभार ९ हजार ८ सय ७० हुन्छ । त्यसमध्ये पाँच दलीय गठबन्धनको कुल मतभार कांग्रेस, माओवादी, एकीकृत समाजवादी र जसपाको गरी ७ हजार ३ सय २ हुन्छ ।