सशस्त्र प्रहरी धनुषाले भव्यताका साथ मनायो २१ औं स्थापना दिवस

न्यूज ब्यूरो, जनकपुरधाम । मधेश प्रदेशको धनुषा जिल्लाका प्रमुख जिल्ला अधिकारी सुरेन्द्र पौडेलले धनुषामा सशस्त्र प्रहरी निगरानी कडा भएको बताएका छन् ।

सीमा क्षेत्र सहित दैवी प्रकोपमा सशस्त्र प्रहरीले उल्लेख्य भूमिका निर्वाह गर्दै आएको बताउँदै उनले सीमा क्षेत्रमा अझै कडा निगरानीको आवश्यकता औल्याए ।

सशस्त्र प्रहरी बलको २१ औँ स्थापना दिवसका अवसरमा धनुषाको जनकपुरधामस्थित सशस्त्र प्रहरीको ८ नम्बर गणले आयोजना गरेको स्थापना दिवसको कार्यक्रमलाई सम्बोधन गर्ने क्रममा प्रमुख जिल्ला अधिकारी पौडेलले देश र नागरिकका लागि सशस्त्र प्रहरीले गरेको योगदान अतुलनीय रहेको बताए ।

उनले भने, “आफ्नो स्थापना कालको छोटो समयमा सशस्त्र प्रहरीले देश र जनताका लागि निकै राम्रो काम गरेको छ, देशको सीमा बचाउन सीमा क्षेत्रमा खटिएको उक्त टिमको काम अतुलनीय छ, दैवी प्रकोपका बेला सशस्त्र प्रहरीले गर्ने कामको हामी सदा सम्मान गर्ने छौँ ।”

जिल्लामा शान्ति सुरक्षादेखि कोरोना जोखिम नियन्त्रण तथा रोकथामका लागि सशस्त्र प्रहरी अहोरात्र खटिँदै आएको बताउँदै प्रजिअ पौडेलले सशस्त्रको योगदान देश र नागरिकका लागि स्मरण योग्य रहेको जिकिर समेत गरे ।

२१ औँ स्थापना दिवसको अवसरमा आयोजना गरिएको खेलकूद कार्यक्रममा उत्कृष्ट हुने खेलाडीहरु तथा गत महिनाको उत्कृष्ट प्रहरी जवानको रुपमा चयन भएका प्रहरी जवानहरुलाई पुरस्कार तथा सम्मान समेत गरिएको थियो ।

जनकपुरधामस्थित ८ नम्बर गण हेडक्वाटरमा प्रहरीलाई पुरस्कार वितरण गर्दै एसपी सुवेदीले पौष महिनाको लागि उत्कृष्ट प्रहरी जवान घोषित भएका हबल्दार दिपक चन्दलाई सम्मान गरिएको थियो ।

धनुषामा आएको केही दिनपछि नै एसपी सुवेदीले भारतसँग रहेको सीमानाकाहरुमा कडाई गरेका छन् । दिनहुँ जस्तो भन्सार छली गरी ल्याउने समान बरामद, पक्राउको साथै अपरेशन गरी तस्करहरुलाई समाउन सक्रिय मानिएको छ । प्रजिअ पौडेलले समेत एसपी सुवेदीको प्रशँसा गरे ।

एक हप्ते कार्यकालमै एसपी सुवेदीले १० लाख रुपैयाँ भन्दा अधिकको भन्सार छलीको समानहरु बरामद गरी भन्सार कार्यालय जनकपुरमा बुझाउन सफल भएका छन् ।

कार्यक्रममा श्रीनाथ गण महेन्द्रनगरका प्रमुख सेनानी गजेन्द्र रावल, जिल्ला प्रहरी कार्यालय धनुषाका एसपी बसन्त रजौरे, नम्बर ८ गण धनुषाका सहायक गणपति डिएसपी निर्मल खडका, सशस्त्र प्रहरीका भूपु कर्मचारीहरु,धनुषा जिल्लाभरिका बेस प्रमुख र बिओपी प्रमुखहरु साथै धनुषाका सशस्त्र प्रहरीका कर्मचारीहरुको सहभागीता रहेको थियो ।