'उपेन्द्र यादव' को विरोधमा बोल्नेहरुलाई गाउँघरबाट लखेटनुपर्छः खालिद सिद्धिकी

न्यूज ब्यूरो, जनकपुरधाम । जनता समाजवादी पार्टीका एक नेताले जसपाका अध्यक्ष उपेन्द्र यादवको विरोधमा बोल्नेहरुलाई गाउँ घरबाट लखेटनुपर्ने अभिव्यक्ति दिएका छन् ।

मधेश आन्दोलनका प्रथम शहिद रमेश महतो सहित मधेश आन्दोलनको बलिदानी दिवसको अवसरमा सिरहामा जसपा पार्टीले आयोजना गरेको कार्यक्रममा जसपाका केन्द्रीय सदस्य खालिद सिद्धिकीले उपेन्द्र यादवको विरोधमा बोल्नेहरुलाई गाउँघरबाट लखेटनुपर्ने उत्जेक अभिव्यक्ति दिए ।

उनले जनमत पार्टीका राष्ट्रिय अध्यक्ष डा. सीके राउत र उनका कार्यकर्तालाई लक्षित गर्दै उनीहरुलाई गाउँघरबाट लखेट्नुपर्ने अभिव्यक्ति दिएका हुन् ।

सिरहामा आयोजित १५ औं बलिदानी सभालाई सम्बोधन गर्दै सिद्धिकीले उपेन्द्र यादवलाई अवसरवादी भन्नेहरुलाई गाउँ घरबाट लखेटन जसपाका युवाहरुलाई खुल्ला निर्देशन दिएको भिडियोमा सुनिन्छ ।

उनले पार्टी अध्यक्ष उपेन्द्र यादवलाई अवसरबादी भन्नेहरु जो कोहीलाई गाउँघरबाट लखेट्नुपर्ने चेतावनी दिए । उनले उपेन्द्र यादवले कहिले नातागोतालाई नदेखेर निःस्वार्थ भावनाले मधेशको लागि राजनीति गरेको भन्दै अवसरवादी भन्नेहरु जोकोहीलाई गाउँ घरबाट लखेटनुपर्ने चुनौति पनि दिए ।

उनले भने –“उपेन्द्र यादव न सम्धीलाई न छोरालाई कुनै अवसर दिए । उहाँ त्याग र बलिदानीको इतिहास तीन दशकदेखि रचिरहेका छन् तर पनि अवसरबादी भनेपछि दुःख लाग्छ । मधेसी जनता र यूवाले यस्ता तत्वहरुलाई गाउँघर र गल्लीबाट लखेनुपर्ने आवश्यकता छ । चाहे जनमत होस्, चाहे सीके राउत वा उनका चम्चाहरु ।”

जनता समाजावदी पार्टीले प्रदेश २ बाट राष्ट्रियसभा सदस्यको उम्मेदवार बनाएको छ । बुधबार नै संघीय मन्त्री रेणु यादवले समेत डा. सिके राउत र आन्दोलनकारी किसानहरुसँग अर्को गौर घटना घटाउने धम्की दिएकी हुन् ।