सउदीमा फँसेका १६ जना नेपालीलाई यी अभियन्ताहरुले गरे सकुशल उद्धार, मेनपावरले क्षतिपूर्ति दिने

न्यूज ब्यूरो, जनकपुरधाम । परिवारिक आर्थिक बोझको बाध्यताले विदेश गएका १६ जना नेपालीलाई युवा अभियन्ताहरुले उद्धार गरेका छन् ।

वैदेशिक रोजगारीको क्रममा खाडी मुलुक सउदी अरेबिया गएका १६ जना नेपालीहरु सउदीमा अलपत्र पर्दा अभियन्ताहरुले उनीहरुलाई सकुशल उद्धार गरेको हो ।

विगत ९ महिनादेखि नै बिना तलबको काम गरी बाध्यात्मक जीवन बिताएका १६ जना युवाहरुको वस्तुस्थितिबारे जानकारी पाएपछि कानुनका विद्यार्थी गुमस्ता कुमार यादवको विशेष पहलमा उनीहरुलाई उद्धार गरिएको हो ।

कानुनका विद्यार्थी सहित युवा अभियन्ता रहेका सिरहाको सुखिपुर नगरपालिका वडा नम्बर ३ बस्ने गुमस्ता यादव, वडा नम्बर ३ बस्ने शिव कुमार यादव र विराटनगर बस्ने समाजिक अभियन्ता जेरी ताम्राकरले विशेष पहल गरी उनीहरुलाई सकुशल नेपाल फर्काएको हो ।

सउदी पुगेका बल बहादुर धामी, तेज बहादुर कुँवर, रेवत खडका, मिलन श्रेष्ठ, गणेश राय, राहुल सुनार, सन बहादुर सुनार, टोपराज महतो, कौशल तामाँग, भोज कुमार लगायत १६ जना विगत ९ महिनादेखि अलपत्र परेकोमा उनीहरुलाई उद्धार गरिएको हो ।

साउदीबाट नेपाल आएका युवाहरूको साउदीमा काम गरेको बाँकी बक्यौता रकम तथा तलब सम्बन्धि समस्याहरु बारे कुपनडोल काठमाडौं रहेको मेनपावर संचालकसँग छलफल गरी उनीहरुलाई क्षतिपूर्ति दिने सहमति भएको हो ।

नेपालस्थित रहेको साउदी राजदुतावास, मेनपावरसँग सहकार्य गरी उनीहरुलाई सकुशल घर फर्काइएको हो । संचालकले बाँकी बक्यौता रकम तथा तलब दिलाउन पहल गर्ने प्रतिबद्धता गरेको बताइएको छ ।

साथै सबैलाई बिहानको चिया, नास्ता, खाना र बस पार्कसम्म जानको लागि टेक्सी भाडा लगायत काठमाडौंबाट घर जानको लागि प्रति व्यक्ति तत्काल १०÷१० हजार रुपैयाँ समेत दिलाएर पठाएको अभियन्ता गुमस्ता कुमार यादवले बताए ।

थप साउदीमा फसेका युवाहरुलाई पाउनु पर्ने तलबको लागि केही हप्तामा मेनपावर संचालक साउदी गएर राजदुतावाससँग सहकार्य गरि फसेकालाई युवाहरुलाई नेपाल ल्याउने र पाउनु पर्ने तलब पनि दिलाउने सहमति गराई १६ जना युवाहरुलाई घर पठाएको अभियानता यादवले जानकारी दिए ।