लहानमा बम आतंक, तीन महिनामा तीन बम विस्फोट

न्यूज ब्यूरो, सिरहा, ११ चैत्र । लहान ७ स्थित एक सुनचांदी पसलमा शुक्रबार भएको बम विस्फोटको विरोधमा आह्वान गरिएको लहान बन्दले जनजीवन प्रभावित भएको छ ।

लहानको विकास ट्रेडर्स (सुनचांदी पसल) मा गराइएको बम विस्फोट घटनाका दोषीमाथि कारवाही गर्न माग गर्दै उद्योग वाणिज्य संघ लहानले बन्द आह्वान गरेको हो । यससंगै लहान सुनचांदी व्यावसाय संघका अध्यक्ष श्यामकुमार साहद्धारा जारी गरिएको विज्ञाप्तीमा बम विस्फोट घटनामा घाईते भएका र ७ बर्षीय नावालकको चिन्ताजनक अवस्था रहेकोले यस्ता जघन्य अपराध एवं जनधनको क्षती गराएको कार्यप्रति घोर भत्र्सना गरिएको उल्लेख छ ।

बन्दका कारण बिहानैदेखि सवारी साधन नचल्दा यहाँको जनजीवन प्रभावित भएको छ । अत्यावश्यकीय दमकल, खानेपानीका ट्यांकरलगायत सवारी साधन चलेपनि सार्वजनिक तथा निजी सवारी न्यून चलेका छन् ।

यसैबीच, यस्ता अपराधिक घटनाका तुरुन्त छानविन र अनुसन्धान गरी दोषीलाई कारवाही गर्न माग मानव अधिकार संगठनका केन्द्रीय सदस्य तथा सिरहा अध्यक्ष राजकुमार राउतद्धारा जारी विज्ञप्तीमा उल्लेख छ । यस्तै, घटनाको विरोध गर्दै नागरिकको शान्ति सुरक्षाप्रति गम्भिर हुन लहान स्थित रहेको एक दर्जन संघसंस्थाले संयुक्त विज्ञप्ती जारी गरेको छ । संयुक्त विज्ञप्ती जारी गर्ने संस्थाहरु मानव अधिकार संरक्षण केन्द्र संजाल ,मानव अधिकार निगरानी समूह, मानव अधिकार संचार प्रतिष्ठान, इन्सेक, जुरी नेपाल, समग्र जनउत्थान केन्द्रलगायत एक दर्जन संघसंस्था रहेको छ ।

लहानमा पछिल्ला दिनमा व्यापारी लक्षित विस्फोटका घटना बढेका छन् । गत मंसिर २८ यता मात्रै व्यापारी निशाना गरेर ३ वटा विस्फोटका घटना भएका छन् । लहानको सहिद चौक स्थित रहेको नेपाल साईकल स्टोर अगाडि, शुभ लक्ष्मी किराना स्टोर अगाडि र आज विकास ट्रेडर्समै शक्तिशाली बम विस्फोट भएको छ । कृष्ण मनि ट्रान्फरको २२ लाख चोरी र पत्रकार मनोज बनैताको घरमा चोरी हुंदा अहिलेसम्म अपराधी तथा चोर पता लाग्न नसकेको रहस्मय बन्दै गएको छ । असुरक्षा बढिरहेका बेला सुरक्षाको माग गर्दै लहान बन्द गराएका हुन् ।

लहानमा भएको तीन महिनाभित्र भएको बम विस्फोटको जिम्मा जयकृष्ण गोइत नेतृत्वको जनतान्त्रिक पार्टीले लिएको छ । विगतको विस्फोटमा तीन जना घाईते भएका थिए ।