डा. सिके राउतको आन्दोलन किसानको लागि होईनः पूर्वराज्यमन्त्री मण्डल

न्यूज ब्यूरो, जनकपुरधाम । जनता समाजवादी पार्टी (जसपा) का नेता एवम् प्रदेश नम्बर २ को पूर्वराज्यमन्त्री सुरेश कुमार मण्डलले डा. सिके राउत किसानको नाममा आफ्नो रोटी सेक्न खोजेको आरोप लगाएका छन् ।

डा. सिके राउत नेतृत्वको जनमत पार्टीले आह्वान गरेको किसान आन्दोलनमाथि टिप्पणी गर्दै नेता मण्डलले आन्दोलनलाई किसानको आन्दोलन नरहेको बताएका छन् ।

नेता मण्डलले आफ्नो अधिकारिक फेसबुक पेजमा टिप्पणी लेख्दै यो बन्द र आन्दोलन किसानको लागि नरहेको बताएका छन् । किसानको लागि नरहेकोले आन्दोलन पनि नरहेको र अराजकता रहेको उल्लेख गरेका छन् ।

“यो बन्द न किसानको हो न किसानको लागि हो। तसर्थ यो आन्दोलन होइन, अराजकता हो। सिके राउतले किसानको नाममा आफ्नो रोटी सेक्न चाहन्छ।”– उनले लेखेका छन् ।

उनले लहान घटना दोहोराएर आफ्नो राजनीतिक अभिष्ट पूरा गर्न खोजेको प्रष्ट रहेको प्रतिक्रिया लेखेका छन् । “दुई वर्षदेखि कोरोनाले थलेको अर्थतन्त्र यो अराजकताले झन कोमामा जानेछ र किसानलाई सबभन्दा ठूलो नोक्सान हुनेछ।”– थपेका छन् ।

डा. सिके राउत नेतृत्वको जनमत पार्टीले किसानको समस्यालाई मुद्दा बनाएर चरणवद्ध आन्दोलन गरिरहेका छन् । किसानहरुको हकहितको लागि जनमत पार्टीले नै कम्यूनिष्टपछि पहिलो पटक आन्दोलन थालेका छन् ।