पूर्व–पश्चिम राजमार्ग अनिश्चितकाल बन्दको घोषणा

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीले पूर्व–पश्चिम राजमार्ग अनिश्चितकालको लागि बन्द गर्ने घोषणा गरेको छ ।

किसानको हकहितको लागि आन्दोलन आरम्भ गरेको जनमत पार्टीले आन्दोलनको नयाँ कार्यक्रम सार्वजनिक गर्दै विहिबारदेखि अनिश्चितकालको लागि राजमार्ग बन्दको घोषणा गरेको हो ।

निमुख किसानहरुको मागप्रति रकारले माग पुरा गर्न चासो नदेखाएको निष्कर्ष निकाल्दै जनमत पार्टीले आन्दोलन सशक्त पार्ने निर्णय गरेको हो ।

बुधवार जनमत पार्टीका केन्द्रीय अध्यक्ष डा. सीके राउतले विहिबारदेखि पूर्वपश्चिम राजमार्ग अनिश्चितकाल बन्दको घोषणा गरेको छ ।

उनले जारी गरेको विज्ञप्तीमा मधेस पस्ने संघीय मन्त्रीको विरोध समेत गर्ने निर्णय भएको उल्लेख छ ।

मन्त्रीस्तरीय वा उच्चस्तरीय वार्ता समिति समेत गठन नगरेको र किसान आन्दोलनको ज्ञापनपत्र लिन समेत प्रधानमन्त्री तथा मन्त्रीपरिषद्को कार्यालयले अस्वीकार गरेर अहंकार प्रदर्शन गरेको आरोप अध्यक्ष डा. राउतले लगाएका छन् ।

डा. सिके राउतको अधिकारीक फेसबुकमा पेजमा डिजिटल विज्ञप्ती जारी गर्दै उनले आन्दोलनकारीमाथि व्यापक बल प्रयोग गरेको, दर्जनों राउन्ड अश्रुग्याँस चलाएको, आन्दोलनकारीहरूको अंगभंग हुने गरी कुटपिट गरेको, किसानहरूमाथि ज्यादती गरेको तथा झुठा मुद्दा लगाएकोले आन्दोलन सशक्त पारेको हो ।

सोही कार्यक्रम अनुसार विहिबार (आज) १५ गतेदेखि तराई मधेशका जिल्लाहरूमा पूर्व पश्चिम राजमार्ग दिवा–कालको लागि अनिश्चित्कालीन् बन्द गर्ने र तराई मधेशका जिल्लाहरूमा संघीय मन्त्रीहरू उपस्थित रहने कार्यक्रमहरूमा विरोध प्रदर्शन गर्ने कार्यक्रम राखेको हो ।