सिरहामा जनमत पार्टीको आन्दोलनमा सहभागी नै नभएका कार्यकर्ता पनि पक्राउ

न्यूज ब्यूरो, सिरहा । सिरहा जिल्लामा जनमत पार्टीले आह्वान गरेको किसान आन्दोलनको बेला सहभागी नै नभएका युवकलाई पनि प्रहरीले पक्राउ गरेको छ ।

जनमत पार्टी आन्दोलन समितिले किसानको पक्षमा गरिरहेको आन्दोलनको क्रममा सिरहामा नभएकै बेला उनी सिरहामा आएपछि पक्राउ गरिएको हो ।

आईतबार सिरहाको नरहा गाउँपालिका वडा नम्बर ३ बस्ने उमानाथ महतोलाई प्रहरीले पक्राउ गरेको हो । उनलाई आन्दोलनमा सहभागी भई उपद्रव मच्चाएको भन्दै पक्राउ गरिएको हो ।

उनका परिवारजनका अनुसार, महतो विगत एक सातादेखि पोखरामा घुमघामको लागि गएको तथा आईतबार मात्रै घर फर्केपछि उनलाई समेत पक्राउ गरिएको हो ।

पोखराबाट फिर्ता आएका महतो आफ्नो पसलमा बसिरहेको अवस्थामा उनलाई प्रहरीले पक्राउ गरेको हो । नरहा गाउँपालिका वडा नम्बर ३ चोहर्बाबाट उनलाई पक्राउ गरिएको बताइएको छ ।

आईतवारको सिरहा जिल्ला आमहड्ताल र सोमवारको चक्काजामको समिक्षा पश्चात समितिले आज मँगलबार भोली बुधवार समेत सिरहा जिल्लाभर चक्काजाम गर्ने निर्णय गरेको हो ।

समितिका पवन यादवले विज्ञप्तीमार्फत मंगलवार र बुधवार समेत सिरहा जिल्लामा चक्काजाम यथावत रहने जानकारी दिएका हुन् ।

किसान आन्दोलनलाई एक्यवद्धता जनाउदै गरेको आमहडतालमा प्रशासनद्धारा किसानहरुमाथि भएको व्यापक दमनप्रति घोर भत्र्सना गर्दै पक्राउ परेका कार्यकर्ताको बिनाशर्त रिहाइको माग समेत गरेका छन् ।

किसानको समस्या समाधान प्रति अग्रता नदेखाउनु उल्टै किसानमाथि प्रशासनले दमन नीति लिनु आफैमा निन्दनीय रहेको समितिले ठहर गरेको छ ।

पक्राउ परेका किसानहरु मिथिलेश यादव, सुभाष चौधरी, पटवारी ठाकुर, रुकेश साह श्याम यादव, उमा महतो, सुरेन्द्र यादव, हरेकृष्ण साह सुरेश कामती देव कुमार मुखिया रामवृक्ष यादव, बालेश्वर यादव, महेश यादव, हिरालाल यादवसहितका नेता तथा कार्यकर्तालाई रिहा गर्नुपर्ने लगायतका माग समितिको छ । यदापी आन्दोलनमा सहभागी न भएका कार्यकर्तालाई समेत नेपाल प्रहरीले पक्राउ गरेको छ।