महिला अझै सरकारबाटै उपेक्षित छः उपाध्यक्ष कार्की

न्यूज ब्यूरो, जनकपुरधाम । धनुषाको जनकनन्दिनी गाउँपालिकाकी उपाध्यक्ष भारती कार्की (सहगल) ले महिलाहरु अझै सरकारबाटै उपेक्षित रहेको बताएकी छन् ।

आईतबार १८ औँ राष्ट्रिय महिला समुदायिक स्वास्थ्य स्वयँमसेविका दिवसको अवसरमा आयोजित कार्यक्रममा बोल्दै गाउँपालिधा उपाध्यक्ष कार्कीले सबै तह तप्काबाट महिलाहरु अझै उपेक्षित रहेको बताइन् ।

महिला स्वयँम सेविकाको सेवा सुविधामा समेत सरकारले बक्रदृष्टि राखेको बताउँदै उनले निःस्वार्थ भावनाले अहोरात्र खटने महिला स्वयँमसेविकाहरुको लागि स्थानीय सरकारले समेत केही थप नसोचेकोप्रति आपत्ति जनाइन् ।

उनले आफू गाउँपालिका उपाध्यक्ष भन्दा पहिले महिला स्वयँसेविका भएर १५ बर्ष नै काम गरेको बताउँदै उनले महिला स्वयँमसेविकाहरुले केही आर्थिक मददले मात्र गाउँस्तरको टोल टोल र घर घरमा गएर दुतको भूमिका निर्वाह गरेको बताइन् ।

उनले महिला स्वयँमसेविका दिवसको अवसरमा गाउँपालिकाबाट भएको कार्यक्रम आयोजनको लागि समेत ढिलो जानकारी भएको भन्दै बिना कुनै भत्ताको महिलाहरुले देखाएको साहसको प्रशँसा गरिन् ।

कोभिड महामारीको बेला विश्व नै आक्रान्त रहेको बेला सबै जनाले डाक्टर, नर्सलाई फ्रन्टलाईनर भनेर भनिएपनि त्यसको गाउँस्तरमा महिला स्वयँमसेविकाहरु असल फ्रन्टलाईनमा बसेर आफ्नो दायित्व निर्वाह गरेको बताईन् ।

बर्षको १२ हजार रुपैयाँमा एक योद्धा महिलाले मात्र निःस्वार्थ भावनाको काम अहिलेको युगमा गर्ने गरेकी बताईन् । उनले गाउँपालिकामा यसअघि भत्ता ५०० रुपैयाँ मात्र रहेकोमा आफू १००० देखि १५०० सम्म पुरयाएको बताएन् ।

गाउँपालिका उपाध्यक्ष कार्कीकै अध्यक्षतामा भएको सो कार्यक्रममा महिला स्वयँसेविकाहरुले गाउँपालिकाको एम्बुलेन्सले समेत २५०० देखि ३००० रुपैयाँसम्म भाडा लिने गरेकोप्रति ध्यानाकर्षण गराउँदै महिला स्वयँसेविकाहरुले विपन्न, गरिब परिवारलाई निःशूल्क एम्बुलेन्स सेवा प्रदान गर्न गुहार लगाईन् ।

सो क्रममा उपाध्यक्ष कार्कीले कार्यपालिकाको निर्णय बमोजिम नै गाउँपालिकाको एम्बुलेन्सको भाडादर तय भएको बताउँदै कर्मचारीहरुको लागि आधी भाडामा सेवा दिने सुनाईन् । उनले विपन्न परिवार सहित महिला स्वयँमसेविकाको परिवारको लागि कम्तीमा निःशुल्क गर्नको लागि आगामी बैठकमा माग उठाउने बताइन् ।

उनले आफू गाउँपालिकाको उपाध्यक्ष भएर काम गर्दा आफूलाई पनि माथिल्लो व्यक्तिसँग सहकार्य गर्नुपर्ने भएकोले ठोकुवा नगरेपनि माग सम्बोधनको लागि पहल थाल्ने प्रतिवद्धता जनाइन् ।

उनले आफू महिला भएकै कारण पनि स्थानीय सरकारबाट उपेक्षा महसुस गरेको बताइन् । महिलालाई जहाँ पनि पुरुष प्रधान समाजले हैकमदवादी प्रवृति देखाउँदै आएको उनले थपिन् ।

कार्यक्रम सँचालन गरेका जनकनन्दिनी गाउँपालिकाका समाजिक सुरक्षा शाखा एवम महिला तथा बालबालिका शाखाका रबिन मण्डलले महिला स्वयँमसेविकाहरुको गुनासो टिपोट गरी कार्यपालिका बैठकमा पेश गर्ने प्रतिवद्धता जनाए ।

महिला स्वयँमसेविका दिवसमा जनकनन्दिनी गाउँपालिकाको ६ वटै वडाकी स्वयँमसेविकाहरु सहित विभिन्न स्वास्थ्यचौकीका प्रमुहरुको सक्रिय उपस्थिति रहेको थियो । सो क्रममा उनीहरुले आ आफ्नो धारणा राखेका थिए ।

उनीहरुले समेत महिला स्वयँसेविकाहरुको माग जायज रहेको बताउँदै सेवा सुविधा थप गर्नुपर्ने धारणा राखेका थिए ।