प्रदेश २ः जेलभित्रै कैदी झुण्डिएको अवस्थामा फेला

न्यूज ब्यूरो, रौतहट । प्रदेश नम्बर २ को रौतहटस्थित एक कैदी जेलभित्रै झुण्डिएको अवस्थामा भेटिएका छन् ।

रौतहटको सदरमुकाम गौरमा रहेको कारागारमा बन्दी जीवन बिताइरहेका एकजनाले आत्महत्या गरेको बताइएको छ ।

अपहरण, शरीर बन्धक तथा जबर्जस्ती करणी मुद्दामा कैदी जीवन बिताइरहेका देवाही गोनाही नगरपालिका ७ का लडाई साह तेलीले आत्महत्या गरेको रौतहटका सिडिओ कृष्ण बहादुर शाहीले जानकारी दिए ।

झुण्डिएको अवस्थामा फेला परेका उनलाई उपचारको लागि जिल्ला अस्पताल गौरमा लगिएकामा डाक्टरले बुधबार दिउँसो २ बजे मृत घोषणा गरेको शाहीले जानकारी दिए ।

उनीमाथि जिल्ला अदालत रौतहटले २१ बर्षको सजाय तोकेको थियो । उनी २०७६ वैशाख ४ गतेदेखि कैदमा रहेका थिए । घटनाको सन्दर्भमा अनुसन्धान भइरहेको रौतहट प्रहरी प्रमुख एसपी बिनोद घिमिरेले जानकारी दिए ।