प्रदेश २ः एउटै परिवारको दुई बालकको मृत्यू भएपछि टोल नै शोकमा

न्यूज ब्यूरो, रौतहट । प्रदेश नम्बर २ मा एउटै परिवारको दुई जना बालकको मृत्यू भएपछि सिँगो टोल नै शोकमा रहेको छ ।

प्रदेश नम्बर २ को रौतहट जिल्लामा एकै परिवारका दुई बालकहरुको विषका कारण मृत्यु भएको बताईएको छ ।

रौतहटको देवाही गोनाही नगरपालिका वडा नम्बर ५ टिकुलियाका सञ्जय मुखियाका ५ वर्षीय छोरा आकाश र ४ वर्षीय छोरा विकासको मृत्यु भएको हो । उनीहरुको उपचारको क्रममा ज्यान गएको हो ।

ती बालकहरुलाई सुरुमा उपचारका लागि गरुडा लगिएको थियो तर स्वास्थ्यमा सुधार नआएपछि थप उपचारका लागि वीरगञ्ज लग्दै गर्दा बाटोमै ज्यान गएको हो ।

यता, दुवै बालकहरुलाई रिसिवीका कारण गाउँकै स्थानीयले विष खुवाई ह त्या गरेको परिवारजनको आरोप छ । प्रहरीले यस घटनालाई शंकास्पद भन्दै गम्भीर अनुसन्धान गरिरहेको जनाएको छ ।

जिल्ला प्रहरी कार्यालय रौतहटका प्रहरी उपरीक्षक (एसपी) विनोद घिमिरेले भने, ‘बालकहरुको विषका कारण मृत्यु भएको छ । घटना शंकास्पद रहेकाले हामीले अनुसन्धान गरिरहेका छौं, बालकहरुलाई कसले किन विष दियो भन्ने विषयमा हामी गम्भीर रुपमा छानबिन गर्छौं ।’