महापर्वपछि महाआन्दोलनको पालोः डा. सिके राउत

न्यूज ब्यूरो, जनकपुरधाम । जनमत पार्टीका राष्ट्रिय अध्यक्ष डा. सिके राउतले महान पर्व छठपछि महाआन्दोलनको चेतावनी दिएको छ ।

डा. सिके राउतको सचिवालयका अनुसार, मधेशको महान पर्व छठको समापनपछि महाआन्दोलनको चेतावनी दिएको हो । हिरासतमा रहेका जनमत पार्टीका १७ जना नेता कार्यकर्तालाई रिहाईको लागि महाआन्दोलन गरिने बताएको छ ।

“आज उदाउँदो सूर्यलाई अर्घ्य दिई छठ महापर्व सम्पन्‍न भएको छ। तर आमनागरिकको जीवनमा सूर्योदय भएको छैन। राज्यको दमन जारी छ।”– उनले भनेका छन् ।

मधेश करौडौं बत्ती बालेर झिलीमिली गर्दै धूमधामसँग छठ मनाइराख्दा मधेशका १७ सपूतहरू नेपाल प्रहरीको हिरासतमा यातना भोगिरहेको बताउँदै उनले आफू समेत २०७१ सालमा पहिलो पटक पक्राउ पर्दा दशैं, तिहार र छठ सबै हिरासतरजेल भित्रै बितेको बताएका छन्।

“अन्तिम पटक रौतहट हिरासतमा रहँदा त झन् पीडादायक थियो । प्रहरीले हामी पाँच जनालाई त्यही छठको घाट हुँदै सरकारी वकीलको कार्यालय लैजान्थे, हामी छट्पटिरहन्थ्यौं। त्यो छट्पटी, त्यो यातना, त्यो विभेद अझै रोकिएको छैन। त्यसैले छठ महापर्व पछि मधेशमा महाआन्दोलनको पालो आएको छ। अन्धकाररूपी राज्यसत्ताका दमनकारी संयन्त्रहरू फालेर जनताको जीवनमा सूर्योदय ल्याउने बेला आएको छ।”– उनले भनेका छन् ।

जनकपुरस्थित संघीय खानेपानी तथा ढल व्यवस्थापन कार्यालयका डिई राजेश कुशवाहालाई जनकारवाही भन्दै कपडा च्यातेर शहर घुमाएपछि प्रहरीले सोही आरोपमा जनमत पार्टीका १७ जना नेता कार्यकर्तालाई पक्राउ गरेको हो ।