४ बर्षिय बालिकासँग दुष्कर्म गर्ने महतो पक्राउ

न्यूज ब्यूरो, जनकपुरधाम । एक ४ बर्षिय बालिकासँग दुष्कर्म गरेको आरोपमा एक युवकलाई प्रहरीले पक्राउ गरेको छ ।

जिल्ला प्रहरी कार्यालय सिरहाले धनुषाको कमला नगरपालिका वडा नं. ६ बस्ने एक युवकलाई पक्राउ गरेको हो । उनले बालिकासँग दुष्कर्म गरेको आरोप छ ।

सोमबार करिब ७ः३० बजे बेलुकाको समयमा सिरहा जिल्लाको कल्याणपुर नगरपालिका वडा नम्बर ११ स्थित आँपको बगैचामा लगेर ४ बर्षिय बालिकालाई करणी गरेको आरोप छ ।

सोही कसुरमा कमला नगरपालिका वडा नम्बर ६ बस्ने अन्दाजी बर्ष २० को शेष कुमार महतोलाई पक्राउ गरिएको हो । ईलाका प्रहरी कार्यालय कल्याणपुरले उनलाई पक्राउ गरेको प्रहरीले जनाएको छ ।

उनलाई ईलाका प्रहरी कार्यालय कल्याणपुरबाट खटिएको प्रहरी टोलीले सोही दिन ८ बजे बजेको समयमा जिल्ला सिरहा कल्याणपुर नगरपालिका वडा नम्बर ११ मिलनचौक स्थितबाट पक्राउ गरेको जनाइएको छ ।

महतोलाई आवश्‍यक कारवाहीको लागि ईलाका प्रहरी कार्यालय मिर्चैयामा बुझाएकोमा सम्मानित सिरहा जिल्ला अदालतबाट दिन ७ (सात) म्याद लिई थप अनुसन्धान कार्य भईरहेको प्रहरीले जनाएको छ ।

बालिकाको स्वास्थ्य परीक्षण गर्दा उनीसँग दुष्कर्म भएको पुष्टि भएको प्रहरीले जनाएको छ ।