शनिबारदेखि नेपाल भारत मैत्री जनकपुर–पटना बस पुनः सुचारु हुँदै

न्यूज ब्यूरो, जनकपुरधाम । नेपाल भारत मैत्री बस जनकपुरधामदेखि भारत बिहारको पटनासम्मको बस सेवा पर्सी शनिबारदेखि पुनः सुचारु हुने भएको छ ।

कार्तिक २० गते शनिबारदेखि प्रदेश नम्बर २ को अस्थायी राजधानी जनकपुरधाम र छिमेकी मुलुक भारतको बिहार राज्यको राजधानी पटनासम्म नेपाल भारत मैत्री बस सेवा पुनः सुचारु हुने भएको छ ।

यसअघि पनि चल्दै आएको सो बस कोरोनाकालमा नेपाल र भारतका सरकारले दुवै तर्फबाट लकडाउन गरेपछि बस सेवा समेत ठप्प भएको थियो ।

जनकपुरधामको जिरोमाईल बस स्टैण्डबाट जनकपुरका यात्रुहरुले बस चढन पाउनेछन् । यसअघि ५०० रुपैयाँ भाडा रहेकोमा अब ४५० रुपैयाँ (भारु) भाडा हुन सक्ने बताइएको छ ।

जनकपुरधामस्थित माँ जानकी जनकपुरधाम यातायात प्रा.लि.का अध्यक्ष एवम् सँचालक मनोज कुमार चौधरीका अनुसार, भाडा दर अहिले नै तय नभएको तर बढीमा ४५० रुपैयाँ भारुसम्म मात्र हुने बताए ।

जनकपुरधामबाट सीधा पटनासम्म जानको लागि अब यहाँका यात्रुहरुलाई सहजता प्रदान हुने अध्यक्ष चौधरीले विश्वास जनाए । ३६ वटा सीट क्षमता भएको नेपाल भारत मैत्री बस सेवामा कम भाडामा पटनासम्म आरामदायी यात्रा हुने दाबी उनले गरे ।

जनकपुरको जिरोमाईल बस स्टैण्डबाट यात्रु चढन सक्नेछन् भने पटनामा मिठापुर बस स्टैण्डमा ओराल्ने बताइएको छ ।