जनकपुरः दुई युवतिलाई बेच्ने प्रयास गरेका माओवादीका साह र मुखिया खुल्ला घुम्दै

न्यूज ब्यूरो, जनकपुरधाम । धनुषाकी दुई युवतिलाई बेच्ने प्रयास गरेका दुई व्यक्ति अहिले गाउँमा खुल्ला घुम्दैछन् ।

धनुषाको गणेशमान चारनाथ नगरपालिका वडा नं. ११ डुमरियाकी दुई युवतिलाई गत जेठ २३ गते आफ्नो घरमा बोलाएर शरिरको नापजोख गरेका गणेशमानचारनाथ नगरपालिका वडा नम्बर ५ बीरेन्द्रबजार बस्ने रामचन्द्र साह र वडा नम्बर ११ डुमरिया बस्ने गँगाराम मुखिया अहिले खुल्ला घुम्दैछ ।

वडा नम्बर ११ डुमरियाकी दुई युवतिलाई गँगारामले शरिरको उचाई, तौलहरु नाप्दै गरेको बेला स्थानीयहरुले पक्राउ गरेको थियो ।

गत जेठ २३ गते गँगाराम मुखियाकी श्रीमतिले सोही ठाउँ बस्ने एक १६ बर्षिय किशोरी र एक १९ बर्षिय युवतिलाई आफ्नो घर लगेर नोकरी लगाईदिने भन्दै नापतौल गर्दै गर्दा उनीहरुको आमाले देखेपछि हल्ला भएको थियो ।

मुखियाले आफ्नो घर लगेर दुवै जनालाई नापजोख गर्दै उनीहरुलाई नोकरी लगाईदिने र लाखौँ रुपैयाँ महिनाको दिने भनेर प्रलोभन दिएको थियो ।

सुरुमा १६ बर्षिय किशोरीको घरमा आएर गँगारामकी श्रीमतिले उनको आमालाई बोलाएकी थिइन् । आमा दुई महला (घर) मा सुतिरहेको बेला उनले आफ्नी छोरीलाई पठाएकी थिइन् । गँगारामकी श्रीमतिले किशोरीलाई आफ्नो घर लगिन् ।

किशोरीको दुईमहलाबाट नजिकै रहेको गँगाराम मुखियाको कौशीमा हेर्दा उनको छोरीलाई नापजोख गरिरहेको देखेपछि शँका लागेर जाँदा पोल खुलेको थियो ।

गँगाराम र बीरेन्द्र बजारका रामचन्द्र साहले ती दुई युवतिलाई बेच्ने प्रयास गरेका थिए । उनीहरु कतैबाट सँचालित भएर पैसाको लोभमा उनीहरुलाई बेच्ने योजना बुनेका थिए ।

अर्की युवतिको घरमा कसैलाई पनि नभनी एक्लै बोलाएर बिना अभिभावककै अनुमतिले युवतिको नापजोख गरेको थियो ।

सुरुमा उनकी आमालाई नापतौल गरेर तालिममा पठाउने र अधिक रुपैयाँ दिने प्रलोभन दिएको थियो । त्यसपछि युवतिको बुवा आएपछि उनलाई नोकरी लगाईदिने भनेर भने । प्रत्येक दिन कुरा बदल्न थालेपछि उनीहरुलाई शँका लागेको थियो ।

अर्को दिन गँगाराम र रामचन्द्रले महोत्तरीको प्रसिद्ध स्थल परौल स्थानमा एक बाबाले नापतौल अनुसारको युवति ल्याएपछि मोटो रकम पाउने भनेर बताएका थिए । यद्यपी, यसबारे कसैले पनि खोजबिन त्यतिबेला गरेनन् ।

युवतीहरु दुवै जना गरिब परिबारबाट छन् । उनीहरुलाई नोकरी लगाईदिने भनेर अधिक प्रलोभन दिएपछि उनीहरुले शरिरको नापजोख गर्न दिएको थियो ।

त्यतिकैमा स्थानीय युवा अगुवा श्याम कुमार यादवलाई सो कुरा थाहा भएपछि उनले युवतिहरुलाई बेच्ने प्रयास भएको बताएका थिए । सो ठाउँमा पुगेका श्याम यावद सहितका युवाहरुको टोलीले उनीहरुलाई लखेटेका थिए । उनीहरुको भिडियो समेत युवाहरुले बनाएर फेसबुकमा पोष्ट गरेका थिए ।

उनीहरुलाई स्थानीयहरुले पक्राउ गरी प्रहरीलाई जिम्मा लगाएको थियो । प्रहरीले उनीहरलाई थुनामा राखेर अनुसन्धान गरी २६ दिनसम्म प्रहरीकै नियन्त्रणमा राखिएको थियो । उनीहरुमाथि मुद्दा दायर गरी स्थानीयहरुले कारवाहीको लागि अग्रसर भएको थियो ।

सो अघि स्थानीय स्तरमै पँचाय मार्फत घटना मिलाउन स्थानीय नेताहरुले प्रपँच रचे । वडा नं. ११ का वडाध्यक्ष सत्यनारायण कुँवर दनुवारले समेत आफू सो घटनालाई दबाएका थिए । वडासदस्यहरुलाई समेत केही नबोल्नको लागि दबाब समेत दिएका थिए ।

माओवादीबाट जितेका वडाध्यक्ष कुँवरले आफ्नो मान्छे भएको भन्दै उनीहरुलाई उम्काउन पावर लगाएका थिए । गणेशमान चारनाथ नगरपालिकाकै एक जनाले घटना मिलाउनको लागि किशोरीकी आमालाई खेतमा लगेर २ लाख रुपैयाँ अफर गरेको बताइएको छ ।

सो घटना गाउँमै मिलाउनको लागि स्थानीय माओवादीका नेता दुखिया मुखियाले स्थानीयसँग भनेका थिए । कानुन प्रक्रियामा नजान मुखियाले नै दबाब बनाएका थिए । तर, गाउँलेहरुले उनीमाथि मुद्दा दायर गर्न सफल भए ।

यस घटनामा सोही नगरपालिकाका एक मानवअधिकारकर्मी भन्नेले समेत घटना मिलाउन रकम अफर गरेको आरोप छ । उनलाई खेतमा लगेर दुई लाख रुपैयाँ लिएर चुप लाग्न दबाब दिएको बताइएको छ ।

२६ दिन थुनुवामा बसेपछि आईतबार जिल्ला अदालत धनुषाले दुवै जनालाई सफाई दिएको हो । प्रहरीको अनुसन्धानको क्रममा प्रमाण नै नपुगेको भन्दै उनीहरुलाई सफाई दिएको बुझिएको छ ।

स्थानीय श्याम कुमार यादवका अनुसार, प्रहरीले समेत चासो नलिँदा उनीहरुले सफाई पाएको बताए । प्रहरीले गहिरो अनुसन्धा अझै गरे उनीहरुको समूहको पर्दाफास हुने विश्वास जनाए ।

गँगाराम मुखिया र रामचन्द्र साहले मानवबेचनविखनको एक समूहसँग आवद्ध भएर सो योजना बनाएको हुन सक्ने भन्दै प्रहरीलाई अनुसन्धानको लागि दबाब दिने बताए । यो घटना दबाउनको लागि एक मानवअधिकारकर्मी समेत सँलग्न रहेको बुझिएको छ ।

गँगाराम मुखिया र रामचन्द्र साह माओवादी पार्टीका कार्यकर्ता भएकोले उनलाई राजनीतिक सँरक्षण र पहुँचबालाहरुले बचाएको आरोप पनि लगाए ।