डा.सिके राउतको 'चलु जनकपुर, भरु जनकपुर' मा हजारौँ कार्यकर्ता उतार्ने

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीको जनकपुरमा आज चलु जनकपुर, भरु जनकपुर कार्यक्रम अन्तर्गत हजारौ कार्यकर्ता जिल्ला प्रहरी कार्यालय धनुषा घेराउ गर्ने भएको छ ।

शुक्रबार जनमत पार्टीले प्रदेश नम्बर २ को अस्थायी राजधानी जनकपुरधामस्थित रहेको जिल्ला प्रहरी कार्यालय धनुषा घेराउ गर्ने कार्यक्रम रहेको जनाइएको छ । यसको लागि गाउँ गाउँबाट कार्यकर्ताहरु जनकपुर आउने बताइएको छ ।

मधेश आन्दोलन कहिले समाप्त नभएको उल्लेख गर्दै डा. राउतको सचिवालयले मधेश आन्दोलनको माग पुरा नभएसम्म मधेश आन्दोलन जारी रहने समेत उल्लेख गरिएको छ ।

“मधेश आन्दोलन जिन्दाबाद था, जिन्दाबाद है, जिन्दाबाद रहेगा, मधेश आन्दोलन न तो कभी रूका था, न तो कभी रूकेगा, मधेशी वीर आज दिखा दो , मधेश आन्दोलन की माग पूरा कराओ” भनेर भनिएको छ ।

जनमत पार्टीका दर्जनौ कार्यकर्तालाई जिल्ला प्रहरी कार्यालय धनुषाले नियन्त्रणमा लिएको विरोध गर्दै जनमत पार्टीले जिल्ला प्रहरी कार्यालय घेराउ गर्न गाउँ गाउँबाट कार्यकर्ता उतारने भएको छ ।

डा. राउतका अनुसार, जनकपुरमा गरिएको जनकारवाहीपछि प्रहरीले कार्यकर्तालाई नियन्त्रणमा लिएपछि उनीहरुको रिहाईको लागि जनप्रदर्शन गरिने छ । यसका साथै, उनीहरुले किसानहरुको क्षतिपूर्तिको लागि दबाब स्वरुप समेत चलु जनकपुर, भरु जनकपुर कार्यक्रम राखिएको हो ।

जनमत पार्टीले पक्राउ गरिएको कार्यकर्ताहरुलाई यथाशिघ रिहाई नगरे आन्दोलन अर्को मुखतर्फ जाने चेतावनी समेत दिएको हो ।