६६ औँ प्रहरी दिवसः जनकपुरमा 'तपाईको मास्क खोई' भन्दै रयाली

न्यूज ब्यूरो, जनकपुरधाम । ६६ औँ प्रहरी दिवस २०७८ को अवसरमा प्रदेश प्रहरी जनकपुरले “तपाईको मास्क खोई” भन्दै रयाली निकालेको छ ।

प्रदेश २ प्रहरी कार्यालयको आयोजनामा जनकपुरधाम उपमहानगरपालिका वडान नम्बर २ जनकचोकस्थितबाट सयौँको सँख्यामा रहेको प्रदेश प्रहरीका कर्मचारीहरुले “मास्क अभियान” समेत गर्दै रयाली गरेको हो ।

सो क्रममा जनकपुरको विभिन्न स्थानमा बिना मास्क बजारमा हिडने नागरिकहरुलाई मास्क वितरण गरेको थियो । मास्क दिँदै कोरोनाको महामारी र जिम्मेवारीप्रति पनि सचेत गराएको बताइएको छ ।

प्रदेश २ का डिआईजी उमेश रन्जितकारको प्रमुख आतिथ्यमा निकालिएको रयाली जनकचोकहुँदै राजदेवी मन्दिर, जानकी मन्दिर, अस्पताल रोड हुँदै रामानन्दचोकसम्म पुगेको थियो । सो बीचमा मास्क नहुने आम नागरिकलाई मास्क समेत पहिराएको थियो ।

रयालीमा धनुषाका प्रमुख जिल्ला अधिकारी बन्धु प्रसाद वास्तोला, संघीय प्रहरी कार्यालय जनकपुरका प्रमुख प्र.व.उ. उमाशंकर पंजियार, जिल्ला प्रहरी कार्यालय धनुषाका एसपी प्रकाश रानाभाट , सशस्त्र प्रहरी गण जनकपुरका एसपी , अ.स.प्र. गुल्म जनकपुरका प्रमुख , जिल्ला ट्राफिक प्रहरी कार्यालय धनुषाका निमित प्रमुख , सशस्त्र प्रहरी बल नेपाल नं. ८ गण हेड क्वाटर धनुषाका स.प्र.ना.उ, श्रीनाथ गण महेन्द्रनगरका सह से.ना.नि. सहित नेपाल रेडक्रस सोसाईटि जनकपुरका प्रमुख लगायत सयौँ जनाको सहभागिता रहेको थियो ।

सो क्रममा कोभिड–१९ सम्बन्धि बिभिन्न प्लेकाड बोकिएको थियो ।