शहिदनगरमा जनमत पार्टीको नगर कार्यालय स्थापना

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीको नगर कार्यालय धनुषाको शहिदनगरमा स्थापना गरिएको छ ।

जनमत पार्टीले शुक्रबार एक कार्यक्रमबीच शहिदनगर नगरपालिका वडा नम्बर ३ यदुकूहा चोकमा पूजाआजा गरी जनमत पार्टीले नगर कार्यालय खोलेको हो । कार्यालयको उद्घाटन जनमत पार्टीका नेता मदनकुमार यादवले गरेका छन् ।

जनमत पार्टीका विश्वासिलो पात्र मानिएको नेता यादवले शहिदनगरमा पार्टीको सम्पर्क कार्यालय हुने गरी कार्यालयको स्थापना गरेको हो । चुनाव नजिकिदै गर्दा जनमत पार्टीका नेता तथा कार्यकर्ताहरु सक्रिय भएका छन् ।

अगामी निर्वाचनलाई लक्षित गरेर जनमत पार्टीले स्थानीय तहहरुमा कार्यालय संचालनमा ल्याउन थालेको छ । जनकपुरमा बसेको पार्टीको केन्द्रीय विस्तारित बैठकले पनि निर्वाचन लक्षित अभियानहरु सञ्चालन गर्ने निर्णय गरेको थियो ।