शहिदनगरमा नेता शिवधारी यादवका छोरा विशेश्वरले सभापतिमा उम्मेदवारी दिने

न्यूज ब्यूरो, जनकपुरधाम । नेपाली काँग्रेसको १४ औँ नगर अधिवेशनको लागि धनुषाका चर्चित नेता शिवधारी यादवका छोरा विशेश्वर प्रसाद यादव सभापतिमा उम्मेदवारी दिने भएको छ ।

आउँदो असोज ९ गते हुने नेपाली काँग्रेसको १४ औँ नगर अधिवेशनको लागि विशेश्वर प्रसाद यादवले सभापतिमा उम्मेदवारी दिने भएको छ । उनले शहिदनगर नगरपालिकाको नगर सभापतिमा उम्मेदवारी दिने निर्णय गरेका छन् ।

धनुषामै इमान्दारिताको उदाहरण दिइने नेता शिवधारी यादवको जेठा छोरा रहेका विशेश्वर गत वि.सं. २०४६ सालको जनआन्दोलनमा गोली खाएका थिए । पूर्व साँसद समेत रहेका नेता शिवधारी यादवलाई प्रहरीले नियन्त्रणमा लिनको लागि चलाएको छर्रा गोली लागेर विशेश्वर समेत घाईते भएका थिए ।

विशुद्ध रुपमा नेपाली काँग्रेसको दिग्गज नेता मानिएको शिवधारीका जेठा छोरा विशेश्वर यादव पनि विगत ३० बर्षदेखि नेपाली काँग्रेस पार्टीबाट राजनीतिमा सक्रिय छन् । शहिदनगर नगपालिका वडा नं ३ गोठकुहा स्थायी निवासी विशेश्वर प्रसाद यादवलाई सर्व सहमतिले चयन गर्ने सम्भावना पनि देखिएको छ ।

नेपाली काँग्रेस पार्टीमा शिवधारी यादवलाई दिग्गज इमान्दार नेता मानिन्छ । पदीय लोभ कहिल्यै नदेखाएका शिवधारी यादवकै आशिर्वादले विशेश्वर सभापतिको लागि उम्मेदवारी दिने भएका छन् ।