प्रहरी हिरासतबाट भागेका थुनुवा २४ घण्टाभित्रै पक्राउ

न्यूज ब्यूरो, वीरगँज । लागुऔषध मुद्दामा पक्राउ परी प्रहरीको हिरासतबाट भागेका फरार थुनुवालाई प्रहरीले २४ घण्टाभित्रै पक्राउ गर्न सफल भएको छ ।

लागुऔषध मुद्दामा पक्राउ परि जिल्ला प्रहरी कार्यालय पर्साको हिरासतमा रहेका चितवनको भरतपुर महानगरपालिका वडा नम्बर ३ का १४ वर्षीय विक्की सोनार आइतबार बिहान फरार भएका थिए ।

फरार सोनारको खोजबीन तिब्र पारेपछि उनलाई सोमबार नै पक्राउ गरिएको हो । जिल्ला प्रहरी कार्यालय पर्साका प्रहरी उपरीक्षक बेल बहादुर पाण्डेका अनुसार सोमबार विहान करिब ९ बजेको समयमा वीरगँज महानगरपालिका वडा नम्बर ६ शंकराचार्य गेटबाट पक्राउ गरिएको हो ।

उनलाई नेपालबाट भारततर्फ जाँदै गरेको अवस्थामा नियन्त्रणमा लिइ जिल्ला प्रहरी कार्यालयमा सोही मुद्दामा पर्सा जिल्ला अदालतबाट ५ दिनको म्याद थप गरी अनुसन्धान प्रकृया अगाडि बढाएको हो ।

भारतको रक्सौलबाट भदौ १६ गते आउँदै गरेका बेला वीरगन्जको इनर्वा नाकाबाट सोनारलाई प्रहरीले लागुऔषधसहित पक्राउ गरेको थियो । उनको साथबाट लागुऔषध नुर्फिन ७ , डाइजेपाम ७ र फेनारगन ७ गरि २१ एम्पुल बरामद भएको थियो ।

लागुऔषधसहित पक्राउ परेपछि उनलाई जिल्ला प्रहरी कार्यालय पर्साको हिरासतमा राखिएको थियो । पर्साका प्रहरी उपरीक्षक बेलबहादुर पाण्डेका अनुसार , प्रहरी हिरासतमै रहेका बेला भदौ २२ गते अचानक सोनारले रगत छाद्न थालेपछि उपचारका लागि त्यहि दिन नारायणी अस्पतालमा भर्ना गरिएको थियो ।

अस्पतालमा एकजना प्रहरी हवल्दारको निगरानीमै उपचाररत रहेका सोनार, आइतबार बिहान ८ बजेतिर प्रहरी हवल्दारलाई झुक्यार अस्पतालबाट फरार भएका थिए ।

प्रहरी हवल्दारको लापरवाहीकै कारण अभियुक्त सोनार फरार भएकाले ती प्रहरी हवल्दारलाई विभागीय कारबाही गरिने प्रक्रिया समेत थालिएको थियो।