प्रदेश सरकारले दिएनन सार्वजनिक विदा, यी स्थानीय तहहरुमा आज सार्वजनिक विदा

न्यूज ब्यूरो, जनकपुरधाम । प्रदेश नम्बर २ को सरकारले आज चौरचन (चौठचन्द्र) पर्वको अवसरमा सार्वजनिक विदा दिएको छैनन् ।

प्रदेश नम्बर २ को अन्तर्गतको केही स्थानीय तहहरुले आज सार्वजनिक विदा दिएको हो । तराई मधेशमा निष्ठापूर्वक मनाइने चौरचन पर्वको लागि धनुषा सहित ८ वटै जिल्लाका केही स्थानीय तहहरुले आफू निर्णय गरी सार्वजनिक विदा दिएको हो ।

सो क्रममा धनुषाको जनकपुरधाम उपमहानगरपालिकाले समेत आज सार्वजनिक विदा दिएको हो । यसका साथै, धनुषाको कमला नगरपालिकाले समेत आज सार्वजनिक विदाको घोषणा गरेको हो ।

प्रदेश सरकारले अन्य ६ वटा विदा थप गरेकोमा कृष्णाष्टमीको दिन समेत विदा थपिएको थियो । तर, यसपाली केन्द्र सरकारले समेत कृष्णाष्टमीमा सार्वजनिक विदा दिएपछि प्रदेश सरकार र केन्द्र सरकारको विदा बाझेको थियो । थपिएको ६ विदामा चौठचन्द्र पर्वमा विदा उल्लेख भएको छैनन् ।

आगामी बर्षदेखि कृष्णाष्टमीलाई अब कटौती गरी अब चौठचन्द्र पर्वमा विदा सार्ने बताइएको छ । कृष्णाष्टमीको दिन केन्द्र सरकारले नै विदा गरेपछि सोही विदालाई सारेर चौठचन्द्र पर्वमा लगाइने बताईएको छ ।

चौठचन्द्र तराई मधेशमा मनाउँदै आएको आस्थाको पर्व हो । महिलाहरुले मनाउने निष्ठाको पर्व प्रदेश २ को हरेक जिल्लामा मनाइन्छ । अन्य जिल्लाहरुमा पनि चौठचन्द्र पर्व मनाउने गरिन्छ ।