अब शहिदनगरकै यदुकूहामा भिडियो एक्सरे र ECG हुने

न्यूज ब्यूरो, जनकपुरधाम । धनुषाको शहिदनगर नगरपालिकाद्धारा हालै सँचालनमा ल्याएको आकस्मिक सेवा (ईमरजेन्सी सेवा) लगत्तै उपचारको मेसिनहरु थप गरिएको छ ।

शहिदनगर नगरपालिकाका मेयर उदय कुमार बरबरिया (यादव) ले शुक्रबार नगरपालिकाको वडा नं. ३ यदुकूहास्थित रहेको प्राथमिक स्वास्थ्य केन्द्रलाई भिडियो एक्सरे मेसिन र ईसिजी मेसिन हस्तान्तरण गरेका हुन् ।

अस्पतालका निमित्त प्रमुख सुमन्त मण्डल र स्वास्थ्यकर्मी सँजीत प्रसाद यादव मार्फत नगर प्रमुख बरबरियाले हस्तान्तरण गरेका हुन् । धनुषाको जनकपुरधाम बाहेक शहिदनगरले मात्र अस्पतालमा ईमरजेन्सी सेवा सँचालनमा ल्याएको छ ।

यसका साथै, अब गाउँस्तरमै भिडियो एक्सरे सेवा, ईजिजी सेवा उपलब्ध गराएको मेयर बरबरियाले बताए । उनले भने, –“नगरपालिकाको हरेक वडामा स्वास्थ्यचौकी रहेको छ । प्राथमिक अस्पतालमा ईमरजेन्सी सेवा सहित भिडियो एक्सरे सेवाहरु ल्याएका छौँ । अब यो सम्बन्धि विरामी जनकपुर नै जानुपर्ने बाध्यताको अन्त्य भएको छ । निकट भविष्यमै थप सेवासुविधाहरु थप गर्दै जानेछौँ ।”

अस्पतालमा आकस्मिक सेवा सँचालन भएको तीन साताभित्रै भिडियो एक्सरे सेवा र ईसिजी सेवा सुरु गरेको हो ।