विद्यार्थीहरुले पाठयपुस्तक नपाउँदा बालबालिकामा मारमा, अभिभावकमा आक्रोस

न्यूज ब्यूरो, महोत्तरी । महोत्तरी गाउँपालिका अन्तर्गतका बिद्यालयहरुमा पाठ्यपुस्तक अभाव हुँदा विद्यार्थी मारमा परेका छन् ।

पाठ्यपुस्तकको अभावमा बिद्यार्थीहरुले पढन पाएका छैनन् भने अर्कोतिर पुस्तक बिना बिद्यालय नै नजाने बहाना समेत पाउने गरेको अभिभावकहरुको गुनासो छ । श्रीजनता माध्यमिक विद्यालयका ३ सय भन्दा बढी विद्यार्थीहरु अझै पनि पाठ्यपुस्तक विहीन रहेको स्थानीय रजनीश झाले गुनासो गरे ।

उक्त विद्यालयमा ११ सय भन्दा बढी विद्यार्थीहरु अध्ययनरत्त छन् । आर्थिक वर्ष २०७७/०७८ मा गाउँपालिकाले समयमा रकम निकासा नदिदा विद्यार्थी मारमा परेको हो । गापाले ६ लाख ९४ हजार दिनु पर्नेमा ४५ हजार कम निकासा गरेको मडई विद्यालयका प्रधानाध्यापक अजय कुमार झाको गुनासो छ ।

गाउँपालिकाले समयमा आप्mनो जिम्मेवारी पुरा गरेन, उनले भने–‘१८ नम्बरको फर्म भर्न ढिलाइ गर्दा विद्यार्थीहरु पाठ्यपुस्तक देख्न पाएका छैनन् ।’ ‘विद्यालयले किनेर दिन्थ्यो, तर अनियमितताको आरोप लाग्ने डरले विद्यार्थीहरु समस्यामा परेको प्रअ झाले थपे ।

विद्यालयहरुले थप भएका विद्यार्थीहरुको सूचि समयमा नबुझाउँदा समस्या भएको महोत्तरी गाउँपालिकाका शिक्षा अधिकृत जुली ठाकुरले बताइन् । १८ नम्बरको फर्म भर्न ढिलाई भएकोले यस वर्ष पाठ्यपुस्तकको अभाव सृजना भएको उनले स्वीकार गरिन् ।

गाउँपालिका भित्र १३ वटा विद्यालय रहेको र सबैमा विद्यार्थी संख्याको आधारमा रकम पठाएको अधिकृत ठाकुरले बताइन् । यस वर्ष विद्यालयहरुले पाठ्यपुस्तकबाट वञ्चित बिद्यार्थीहरुको लागि विधालय प्रशासनले आन्तरिक आयबाटै किन्नु पर्ने अवस्था रहेको ठाकुरले स्पष्ट पारिन् ।

बिद्यालयहरुले समयमै बिद्यार्थीको सूचि पठाउनु पर्ने तर गाउँपालिकाबाट पटक–पटक पत्राचार गर्दा पनि बिद्यालयहरुले समयमा थप विद्यार्थीहरुको सूचि नै नपठाउने कारणले पाठ्यपुस्तकको अभाव सृजना भएको बताईन् ।