कमला नगरपालिकालाई निर्णय कार्यन्वय नगर्न अदालतको अन्तरिम आदेश

काशिन्द्र शर्मा ||
जनकपुरधाम, २ चैत्त । धनुुषाको कमला नगरपालिकामा अहिले केन्द्र विवाद चर्केको छ । साविककै माचि झिटकैयामा केन्द्र राख्ने वा दुबरकोट हथलेटवामा केन्द्र राख्ने भनेर विवाद चुलिएको छ ।

केन्द्रलाई लिएर नगरपालिकाका मेयर र केही वडाध्यक्षबीच बेमेलले गर्दा विवाद चुलिएको हो । नगरपालिका कार्यालयको केन्द्र साविक माचि झिटकैयामै राख्ने अडानमा वडाध्यक्षहरु रहेका छन् भने केही वडाध्यक्षहरु दुबरकोट हथलेटवामा केन्द्र राख्नुपर्ने भनेर अडान लिएका छन् ।

यता, नगरसभाबाट पारित गरिएको नीति तथा कार्यक्रम कार्यन्वयन नगर्न उच्च अदालत जनकपुरले अन्तरिम आदेश जारी गरेको हो । गत माघ मसान्तको २९ गते नगर परिषद सम्पन्न भएको थियो ।

१२ जना वडा सदस्यहरुले आफूहरुलाई कुनै प्रकारको सुचना नदिइकनै मेयर, उपमेयर र केही वडाध्यक्षहरुले मिलेर गोप्य नगरसभा गरेको रिट उपर सुनुवाई गर्दै अदालतले उक्त निर्णय पारित नगर्न अन्तरिम आदेश गरेको हो ।

उक्त रिट उपरको सुनुवाईको क्रममा विपक्षी बनाइएका मध्येबाट पनि ८ जनाले नगरसभाबारे आफूहरुलाई कुनै जानकारी नभएको प्रतिक्रिया दिएपछि अदालतले तत्काल उक्त निर्णय कार्यन्वयन नगर्न मेयर तथा नगर कार्यपालिकाको नाउँमा अन्तरिम आदेश गरेको अधिवक्ता मुकेश कार्कीले बताए ।

यता, नगरपालिकाका मेयर राम उदगार गोईतले नगरसभाबाट नीति नियम, निर्णयहरु पारित गर्न सबैको सहमतिमै भएको दाबी गरेका छन् ।

'नगरसभामा सबैको उपस्थिति र हस्ताक्षर सहित नगर परिषदमा भएको सार्वजनीकिरणमा सबै वडाध्यक्ष, सदस्यहरुले माला लगाएर मञ्चमा उपस्थित भएको भिडियो, फोटो रेकर्ड भएपनि आफूहरुलाई कुनै जानकारी नभएको भन्नु विकास निर्माण कार्यलाई षडयन्त्र गर्नु मात्र भएको न्यूज ब्यूरोसँग भने ।

वडा नं. १ वडाध्यक्ष राजकुमार यादव सहित वडा नं. २ का धनेश्वर यादव, वडा नं. ३ का विशेश्वर यादव, वडा नं. ४ पल्टु कवारी, वडा नं. ८ राजेश्वर मरिक सहितका वडाध्यक्षहरु निरन्तर विरोध जनाउँदै आएका छन् ।

बन्द सत्रको लागि बैठक माचि झिटकैया केन्द्रमा बसेपछि मात्र बैठकमा उपस्थिति जनाउने अडानमा उनीहरु रहेका छन् ।